Aktivistët për të drejtat civile në Gjermani kanë kërkuar një hetim të pavarur mbi dyshimet për racizëm institucional pas vrasjes së një 21-vjeçari me ngjyrë nga një efektiv policie në qytetin e Oldenburgut.
Ngjarja ndodhi pas një konflikti jashtë një klubi nate në orët e para të mëngjesit të 20 prillit.
Sipas autoriteteve, oficeri 27-vjeçar që qëlloi të riun është pezulluar nga detyra ndërsa ka nisur një hetim për vrasje. Prokurorët e përshkruan pezullimin si “procedurë standarde”, ndërkohë që vrasjet me armë zjarri nga policia mbeten të rralla në Gjermani.
Policia nuk ka dhënë identitetin e viktimës për shkak të ligjeve për mbrojtjen e të dhënave, por mediat gjermane dhe organizatat e shoqërisë civile e kanë identifikuar atë si Lorenz A., shtetas gjerman.
Sipas deklaratës zyrtare të policisë, i riu dyshohet se ka spërkatur me piper katër punonjës sigurie të klubit dhe ka kërcënuar persona të tjerë me thikë gjatë arratisjes. Kur u gjet nga patrulla, ai thuhet se ka përdorur sërish spraj piper dhe është afruar në mënyrë kërcënuese ndaj një oficeri, i cili më pas ka hapur zjarr, shkruan Guardian.
Autopsia zbuloi se Lorenz A. u qëllua të paktën me tre plumba nga pas – në pjesën e pasme të kokës, bust dhe ijë – ndërsa një plumb i katërt ka goditur pjesën e sipërme të kofshës. Ai ndërroi jetë më vonë në spital.
Ministrja e Brendshme e Landit, Daniela Behrens, tha se rezultatet e autopsisë ngrejnë “pyetje serioze dhe dyshime të rënda” që kërkojnë sqarim të plotë. Nga ana tjetër, sindikata e policisë ka kërkuar të shmangen gjykimet e parakohshme. “Ka akuza për racizëm sepse i ndjeri ishte një person me ngjyrë,” deklaroi Kevin Komolka nga sindikata PBB, duke kritikuar mënyrën si po paraqitet policia në publik.
Prokurorët po shqyrtojnë pamjet e kamerave të sigurisë dhe materialet audio nga vendi i ngjarjes. Deri tani, nuk ka prova se Lorenz A. ka kërcënuar policinë me thikë. Gjithashtu, është konfirmuar se kamerat e trupit të oficerëve kanë qenë të fikura gjatë incidentit.
Organizata të të drejtave të njeriut, përfshirë Amnesty International dhe Iniciativën e Zezakëve në Gjermani (ISD), i kanë quajtur të shtënat “shqetësuese” dhe kanë kërkuar ngritjen e një mekanizmi të pavarur për hetimin e rasteve të dyshuara për racizëm në polici.
Në një deklaratë, ISD kujtoi viktimën si një basketbollist energjik dhe të dashur nga miqtë e tij, ndërsa Fondacioni Amadeu Antonio theksoi se rasti nuk është i izoluar dhe kërkoi transparencë të plotë në hetime.
Një protestë është paralajmëruar të mbahet në Oldenburg të premten, me pjesëmarrje të organizatave dhe qytetarëve që kërkojnë drejtësi dhe përgjegjësi për ngjarjen.
