Shkup, 17 gusht, Zhurnal.mk – Ministri i Shëndetësisë, Sasho Klekovski, duke iu përgjigjur pyetjes së gazetarëve në lidhje me epideminë në Gostivar, tha se ministria do ta publikojë raportin epidemiologjik më 20 gusht, duke theksuar se fokusi i kësaj është që të dilet në mënyrë transparente dhe të qartë me mësimet e nxjerra.
“Së pari, dua të sqaroj disa dezinformata që po përhapen. Thashë se do ta publikojmë informacion më 20 gusht, domethënë raportin epidemiologjik për Gostivarin. Ai do të tregojë se çfarë dhe si dhe cilat institucione çfarë kanë bërë. Rezultatet e testimit të ujit janë pronë e Ndërmarrjes publike komunale të Gostivarit dhe Qytetit të Gostivarit. Ajo që ministria do të publikojë janë rezultatet që ishin relevante për epideminë dhe kjo është nga 1 janari 2026 deri në kulmin e epidemisë. Meqenëse këto janë kontrolle ditore të ujit, nuk shoh asgjë kontestuese që të publikohen dhe nga NPK si dhe Qendra për Shëndet Publik”, tha Klekovski.
Ai shtoi se rezultatet janë të qasshme në Qendrat për Shëndet publik dhe do të publikohen.
“Fokusi im është të dalim nga kjo në mënyrë transparente dhe të qartë dhe me leksione të nxjerra. Sepse situatat, veçanërisht në Gostivar, përsëriten dhe duhet të shohim në mënyrë strukturore se cili është problemi në furnizimin me ujë, nëse kemi probleme në reagimin e institucioneve, sepse disa institucione janë përgjegjëse për këtë – Shërbimet publike, AUV, Qendrat e shëndetit publik përmes programit kombëtar. Dhe do t’i shpallim të gjitha gjërat, në mënyrën më transparente, asgjë nuk do të mbahet sekret. Do t’i publikojmë si nga viti 2017 ashtu edhe nga viti 2019… çfarë është pronë e ministrisë. Dhe ato janë testet e kryera me programin kombëtar. Dhe ato që janë pronë e Ndërmarrjes publike komunale, duhet që ajo t’i publikojë”, tha Klekovski.
Lidhur me dezinformatat se uji në Shkup është i kontaminuar me esherihia koli, Klekovski tha se nëse kjo do të ishte e vërtetë, drejtori i Klinikës së sëmundjeve infektive nuk do të fliste për ethet e Nilit Perëndimor tani, por do të kërkonte që të vendosnim kontejnerë për t’u kujdesur për të gjithë ata që vijnë për ekzaminim.
“Do të doja të mos keqkuptohem, por sensacionalizmi se në një çezmë të fshatit apo një pus ka ujë jo të mirë… Me ujin jam marrë në karrierën time të mëparshme. Në Maqedoni, në Maqedoninë rurale, një pus i cekët, një çezmë publike pothuajse nuk ekziston. Dhe në shumë prej tyre shkruhet bukur; ‘uji nuk pihet’. Ndotja bakteriologjike është kudo dhe nuk ka nevojë të bëjmë lajme nga diçka që nuk është lajm. Dihet ku është e sigurt, ku nuk është e sigurt. Madje ka ndërtesa të bukura me mbishkrime ‘uji nuk është për t’u pirë’. Nuk dua të përsëris, në një hotel me pesë yje në bregun e Ohrit ka një paralajmërim ‘uji nuk është për pije’. Pra, nuk ka nevojë të krijohet panik shtesë, njerëzit që jetojnë në vendbanimet rurale e dinë çfarë të pinë, çfarë të mos pinë, në shumicën e rasteve është e shënuar”, shtoi Klekovski.
