Ohër, 5 korrik, Zhurnal.mk – Në kulmin e sezonit veror, kur qyteti është i mbushur me vizitorë nga vendi dhe jashtë tij, është rikthyer në fokus edhe çështja e çmimeve. Ndërsa turistët vendas gjithnjë e më shpesh ankohen se një pjesë e shërbimeve janë bërë shumë të shtrenjta, turistët e huaj vlerësojnë se çmimet janë të përballueshme.
“Raporti cilësi-çmim është shumë i mirë. Është më lirë se në Angli”, tha një turist.
“Kemi ardhur nga Australia për pushime me familjen. Kur e krahasoj me Manastirin, këtu është shumë më shtrenjtë, por ky është çmimi i një destinacioni turistik. Çmimet nuk janë tepër të larta”, tha një tjetër turist.
“Në raport me atë që ofrohet, është në rregull. Për ne nuk është keq. Një vend turistik duhet të jetë disi më i shtrenjtë”, u shpreh një vizitor vendas.
“Vijmë nga Çekia dhe çmimet janë krejtësisht në rregull”, tha një turist.
“Do të thosha se çmimet janë të ngjashme me ato në vendin tonë, por është krejtësisht e pritshme, pasi bëhet fjalë për një destinacion turistik. Zakonisht këto vende janë më të shtrenjta”, shtoi një tjetër.
“Për ne nuk është shtrenjtë, përkundrazi është mirë. Është më lirë se në Slloveni”, tha një turist tjetër.
Restorantet dhe lokalet thonë se çmimet përcaktohen në bazë të ofertës, cilësisë së shërbimit, ambientit dhe lokacionit.
“Do ta përsëris edhe një herë, mendoj se për turistët e huaj jemi mjaft të lirë. Ndoshta mysafirët tanë vendas i ndjejnë çmimet si pak më të larta, por ky është realiteti i një qyteti turistik”, deklaroi Asim Çelik, pronar lokali.
Nga Ministria e Ekonomisë paralajmërojnë se çmimet tepër të larta mund të ndikojnë negativisht në sezonin turistik. Edhe pse bëhet fjalë për ekonomi tregu, politika e çmimeve duhet të balancohet me kujdes për të mos cenuar konkurrueshmërinë e ofertës turistike.
“Është sezon turistik dhe vend turistik, por kjo nuk do të thotë se çmimet duhet të rriten pa kufi. Së pari, kjo i largon turistët, ndërsa nga ana tjetër, për çmime të tilla duhet të ofrohet një cilësi shumë e lartë”, deklaroi Marjan Risteski, zëvendësministër i Ekonomisë.
Pavarësisht rritjes së çmimeve, punonjësit e sektorit të turizmit vlerësojnë se Ohri vazhdon të mbetet një nga destinacionet turistike më të përballueshme në rajon, shkruan MRT.
