Zyrtari i Listës Serbe, Igor Simiq, në një konferencë për media ka drejtuar sot akuza në adresë të ministrit Nenad Rashiq pasi ky i fundit ka arritur të fitojë një ulëse në Kuvendin e Republikës së Kosovës. Siç pretendon Simiq, kjo ka ndodhur falë një “inxhinierie politike” në mes të kryeministrit Albin Kurti dhe Nenad Rashiqit.
“Nëse i shikoni rezultatet nga të gjitha komunat, kur bëhet fjalë për komunat me shumicë serbe. Lista Serbe fitoi 32,399 vota, dhe Rashiq 2,976, që përkthehet në 263 më pak se sa nevojiteshin për mandatin e 10-të”, ka thënë Simiq.
Për një akuzë të tillë të Simiq ka folur vetë Nenad Rashiq. Minsitri për Kthim dhe Komunitete në një deklaratë për Radion Evropa e Lirë, thekson se në dy vjetët e fundit ka qenë ministër për Komunitete dhe Kthim në Qeverinë e Kosovës dhe se me punën e tij ka fituar besimin e komuniteteve të tjera joshumicë që jetojnë në Kosovë, e jo vetëm të komunitetit serb.
“Për ta bërë të qartë, komunitetet jetojnë kudo, duke filluar nga serbët, goranët, turqit, boshnjakët, ashkalinjtë, egjiptianët dhe romët. Mënyra se si kemi punuar, mendoj se ka qenë e drejtë të merrnim edhe më shumë vota. Votat tona janë reale dhe jo si të tyre, të importuara nga njerëz që nuk kanë jetuar në Kosovë për 25 vjet”, ka thënë Rashiq.
