Shkup, 27 shtator argument.mk/ – Një njësi zgjedhore dhe lista të hapura janë disa nga përfundimet e nxjerra nga tribuna e platformës “Biseda për të ardhmen 12:05”, deklaroi deputetja e LSDM-së dhe përfaqësuesja e iniciativës, Slavjanka Petrovska.
“Dija, kapaciteti dhe integriteti personal i secilit që do të jetë në listat zgjedhore duhet të jenë më të rëndësishme sesa besnikëria ndaj liderit dhe kryesisë”, tha Petrovska në televizionin Sitel, duke shtuar se interesi i anëtarëve të platformës është një Maqedoni më e mirë.
Ajo përsëriti qëndrimin se qeverinë aktuale e vlerësojnë si më të paaftën dhe se iniciativa është krijuar për shkak se nuk mjafton vetëm të konstatohet dhe të debatohet për problemet, por duhet të ndërmerren veprime.
“Çelësi për këtë pushtet, por edhe për cilindo pushtet, është të ndiejë se ka një kërcënim serioz, se ka konkurrencë. Kjo mund të bëhet vetëm përmes një opozite të fortë. Më gëzon fakti që një pjesë e madhe e pjesëmarrësve nuk janë dhe nuk kanë qenë pjesë e LSDM-së, të strukturave formale. Ndoshta kanë qenë mbështetës, ndërsa disa prej tyre nuk janë as mbështetës. Ata vërejnë se partia kryesore opozitare, ose ajo që duhet të jetë bartëse e lëvizjes opozitare në Maqedoni, duhet të jetë LSDM-ja”, tha Petrovska.
“Por, për fat të keq, sipas vlerësimeve të tyre, nuk është kështu. Kanë kaluar dy vite nga zgjedhja e kryesisë së re të LSDM-së dhe janë evidentuar mangësi serioze në mënyrën e krijimit të politikave dhe marrjes së vendimeve, si dhe në politikën kadrovike, të cilat rezultuan me rezultate jashtëzakonisht të dobëta në zgjedhjet lokale. Kështu u shtrua çështja se LSDM-së i nevojiten reforma serioze, nëse dëshiron të jetë ajo që realisht duhet të jetë”, deklaroi Petrovska.
Ajo theksoi se për problemet e evidentuara kanë diskutuar disa herë me liderin e LSDM-së, Venko Filipçen, por sipas saj, propozimet e tyre janë refuzuar.
Petrovska njoftoi se gjatë javës së ardhshme kryesisë së LSDM-së do t’i dorëzohet strategjia për reforma.
“Nuk do të presim ftesë. Strategjia do të dorëzohet, por parimisht kemi thënë se deri në atë moment nuk do të publikojmë asgjë. Do t’i lëmë kryetarit të partisë ta shqyrtojë. Nëse do t’i nevojiten një, dy ditë, një orë apo dhjetë minuta, kjo është çështje e tij. Nëse do ta komunikojë me opinionin apo jo, ia lëmë atij”, tha ajo.
Petrovska shtoi se nuk do të lejojnë që situata të vazhdojë në këtë mënyrë dhe që, sipas saj, LSDM-ja për shkak të politikave të këqija të mbetet peng i VMRO-DPMNE-së.
“Absolutisht nuk do të lejojmë që gjërat të mbeten kështu dhe që LSDM-ja, për shkak të politikave të këqija, të vazhdojë të jetë peng i VMRO-DPMNE-së dhe të jetë mburoja që vetëm i blen kohë Mickoskit dhe VMRO-DPMNE-së për të qëndruar në pushtet”, theksoi Petrovska.
