Shkup, 5 korrik, Zhurnal.mk – Deputeti i Aleanca për Shqiptarët, Halil Snopçe, ka ngritur shqetësime lidhur me Projektligjin për Përfaqësimin e Drejtë dhe Adekuat, duke vlerësuar se ai nuk parasheh mekanizma të qartë për zbatimin e dispozitave në nivelin e pushtetit lokal, transmeton Zhurnal.mk.
Gjatë debatit parlamentar për projektligjin, Snopçe theksoi se Trupi Koordinues, i cili parashihet me ligj, themelohet dhe përbëhet nga Qeveria dhe do të bashkëpunojë me Agjencinë e Administratës.
Sipas tij, ligji nuk sqaron se në çfarë mënyre do të detyrohen ta zbatojnë këtë ligj kryetari i Qytetit të Shkupit dhe kryetarët e komunave, si dhe nuk përcakton mekanizma për mbajtjen e tyre përgjegjës në rast të moszbatimit të dispozitave.
“Ligji nuk sqaron si do të detyrohen të zbatojnë dispozitat kryetari i Qytetit të Shkupit dhe kryetarët e komunave, apo si do t’u kërkohet përgjegjësi në rast moszbatimi. Ky është një boshllëk serioz. Ligji duhet të parashikojë mekanizma të qartë kontrolli dhe përgjegjësie edhe për nivelin lokal”, deklaroi Snopçe.
Projektligji për Përfaqësimin e Drejtë dhe Adekuat vazhdon të jetë objekt debati në Kuvend, ku deputetët e shumicës dhe opozitës kanë paraqitur qëndrime të ndryshme lidhur me përmbajtjen dhe zbatueshmërinë e tij.
