Strasburg, 26 gusht argument.mk/ – Një rotacion i ri dhe një tjetër shtyrje në procedurën për zgjedhjen e gjyqtarit në Gjykatën Evropiane për të Drejtat e Njeriut (GJEDNJ). Paneli këshillues i ekspertëve pranë Këshillit të Evropës e ka kthyer mbrapsht propozimin e Komisionit maqedonas që Ana Dangova Hug të jetë njëra nga tre kandidatet e propozuara për gjyqtare në Strasburg.
Në Këshillin e Evropës do të dërgohet një emër i ri – avokatja Jelena Ristiç, konfirmoi për Telma kryetari i Gjykatës Kushtetuese, i cili njëkohësisht është edhe kryetar i Komisionit.
„Pas marrjes së njoftimit nga Ministria e Punëve të Jashtme se paneli i ekspertëve kishte vlerësuar se kandidatja e tretë e propozuar, avokatja Dangova, nuk i plotëson në tërësi kriteret e Këshillit të Evropës për gjyqtare në GJEDNJ, Komisioni mbajti takim më 20 gusht dhe njëzëri vendosi që avokatja Ristiç të jetë kandidatja e re“, tha Kostadinovski.
Procedura për zgjedhjen e gjyqtarit maqedonas në GJEDNJ ka nisur para rreth një viti e gjysmë dhe që atëherë është shoqëruar me pengesa dhe polemika të shumta.
Komisioni i parë propozoi gjyqtaren Gabriela Gajdova, prokuroren Lençe Ristovska dhe avokatin Jordan Apostollski, por Qeveria, para se lista të dërgohej në Këshillin e Evropës, e anuloi atë me arsyetimin e shkurtër se kandidatët nuk i plotësonin kushtet.
Qeveria më pas formoi një komision të ri, të kryesuar nga kryetari i Gjykatës Kushtetuese, ku bëjnë pjesë edhe kryetarët e Gjykatës Supreme, Gjykatës Penale dhe Gjykatës Civile, si dhe drejtoresha e Akademisë për Gjykatës dhe Prokurorë Publikë.
Në nëntor të vitit të kaluar, ky komision, së bashku me Apostollskin, propozoi edhe avokaten Natasha Boshkova dhe dekanin e Fakultetit Juridik „Justiniani i Parë“, Sasho Georgievski.
Në maj u bë e ditur se sërish duhej të propozohej një kandidat për vendin e Apostollskit dhe u propozua Dangova. Tani, për herë të tretë, lista është ndryshuar dhe nga kjo listë Këshilli i Evropës duhet të zgjedhë gjyqtarin maqedonas në GJEDNJ.
Kostadinovski pajtohet se procedura ka zgjatur tepër dhe shpreson se këtë herë do të përfundojë me zgjedhjen e një gjyqtari, nëse jo në sesionin e tetorit të Këshillit të Evropës, atëherë në janar.
„Është e saktë që procedura është zgjatur shumë. As unë nuk e prisja këtë. Shtyrja ka disa arsye, ndër to edhe shpejtësia me të cilën punon paneli i ekspertëve. Ne si Komision reagojmë menjëherë kur ka ndonjë vërejtje dhe menjëherë propozojmë kandidat të ri. Por, në përgjithësi, duke llogaritur edhe punën e komisionit të parë dhe të këtij komisioni, procedura po zgjat tepër“, tha Kostadinovski.
Gjyqtari Jovan Ilievski, i cili duhej të largohej nga Strasburgu në fillim të këtij viti, do të qëndrojë atje deri në zgjedhjen e pasuesit të tij.
Për ndryshimin e ri, Telma mësoi nga burimet e veta, ndërsa Komisioni, i cili mori vendimin më 20 gusht, nuk e informoi publikun, ndryshe nga praktika e mëparshme.
Kostadinovski thotë se Komisioni ka vendosur që këtë herë procedura të zhvillohet në mënyrë më diskrete dhe të mos bëhen publike ndryshimet, duke u bazuar në përvojat e disa vendeve të tjera, ku paneli i ekspertëve është përballur me ankesa dhe vërejtje të shumta ndaj të gjithë kandidatëve të propozuar, gjë që e ka ngarkuar më tej procesin.
