Shkup, 8 maj – Kryetari i Kuvendit, Afrim Gashi në kuadër të vizitës zyrtare në Itali sot u takua me senatoren Ema Pavanelli, e cila është edhe kryetare e Grupit Bilateral për Bashkëpunim me Vendet e Ballkanit të Parlamentit të Italisë, Xhulio Tremonti, kryetar i Komisionit për Politikë të Jashtme dhe Evropiane si dhe me Xhilo Vinja, kryetar i Komisionit për Politikat e BE-së.
Siç bëhet e ditur në kumtesën nga shërbimi për informim i Kuvendit në takime kryetari Gashi theksoi se marrëdhëniet dypalëshe midis Republikës së Maqedonisë së Veriut dhe Republikës së Italisë kanë vazhduar për më shumë se tre dekada në një mënyrë të hapur, të ndershme dhe miqësore dhe pa çështje të hapura, të bazuara në miqësinë tradicionale, partneritetin e fortë strategjik dhe bashkëpunimin dhe mbështetjen konstruktive shumëvjeçare, si në nivelin dypalësh, ashtu edhe në atë shumëpalësh.
Mbështetja e vazhdueshme, tha ai, dëshmon vizionin e Italisë për një Ballkan Perëndimor të integruar dhe të qëndrueshëm brenda NATO-s dhe Bashkimit Evropian, emëruesi i përbashkët i të cilit është një rajon i begatë pa konflikte dhe çështje të hapura.
Në takime, Gashi u përqendrua në procesin e skriningut, i cili përfundoi me shumë sukses dy vjet më parë, me vlerësime të larta nga Komisioni Evropian, dhe shprehu pritjen e tij që gjatë kryesimit polak me Këshillin e BE-së, të gjitha vendeve anëtare do t’u dërgohet sinjali konkret dhe i qartë se fillimi i negociatave me Republikën e Maqedonisë së Veriut është më se imperativ, si dhe vlerësim se çdo vonesë e mëtejshme në procesin e zgjerimit të BE-së do të thotë përkeqësim i mëtejshëm i situatës, gjë që do të reflektohet në aspektin ekonomik, energjetik, të sigurisë dhe politik.
Deputetja Bllagica Llasovska, e cila është pjesë e delegacionit të Kuvendit, iu referua kontributit të Republikës së Maqedonisë në politikat e BE-së edhe pse nuk është anëtare e BE-së, nga mbështetja gjatë krizës së migrantëve, përmes harmonizimit me politikën e përbashkët të sigurisë deri te bashkimi me sanksionet e BE-së. Në vend që anëtarësimi të bazohet në kontributin dhe përmbushjen e Kritereve të Kopenhagës, ai kushtëzohet nga kontesti dypalësh. Kjo kontribuon për një perceptim negativ të qytetarëve dhe për rënie të mbështetjes së tyre për anëtarësim në BE.
Deputeti Dimitar Kovaçevski theksoi se mbështetja dhe mirëkuptimi i Italisë për kontributin e vendit tonë në proceset evropiane duhet të transferohet midis vendeve anëtare të BE-së. Sidomos sepse anëtarësimi i vendit tonë në BE nuk do të jetë vetëm përfitim për vendin, por edhe për BE-në.
Në takime u theksua edhe gatishmëria për mbështetjen dhe bashkëpunimin e mëtejshëm të ndërsjellë midis delegacioneve të përhershme në asambletë parlamentare të NATO-s, Këshillit të Evropës, OSBE-së, Mesdheut, UIP-së, si dhe bashkëpunimi konstruktiv në kuadër të Iniciativës Adriatiko-Joniane dhe Iniciativës së Evropës Qendrore, ku Italia është vend themelues.
Siç bëhet e ditur në kumtesë, të pranishmit u zotuan të promovojnë segmente të shumta të bashkëpunimit ndërshtetëror, në ekonomi, por edhe në kulturë, arsim, turizëm dhe shëndetësi, ndërsa Protokolli i Bashkëpunimit mundëson nisjen e iniciativave të shumta për shkëmbimin e përvojave dhe praktikave parlamentare me nevojë dhe interes të ndërsjellë.
