Numri i të vdekurve në Liban në më shumë se një vit luftimesh midis Izraelit dhe Hezbollahut ka arritur në 4 047 persona, shumica prej tyre që nga përshkallëzimi i konfliktit në shtator, thanë sot autoritetet.
Një javë pasi armëpushimi hyri në fuqi, ministri libanez i Shëndetësisë, Firass Abiad u tha gazetarëve se deri më tani ishin regjistruar 4 047 të vdekur dhe 16 638 të plagosur.
Abiad tha se në mesin e të vrarëve ishin 316 fëmijë dhe 790 gra.
“Shumica e vdekjeve kanë ndodhur pas 15 shtatorit – dhe ne besojmë se numri real mund të jetë më i lartë, për shkak të vdekjeve të paregjistruara”, shtoi ai.
Një burim i afërt me Hezbollahun tha se qindra luftëtarë të grupit ishin vrarë, pa dhënë një shifër të saktë.
Ndërsa autoritetet izraelite raportuan të paktën 82 ushtarë dhe 47 civilë të vrarë.
Izraeli e zgjeroi fushatën e tij ushtarake në Libanin jugor, në fund të shtatorit pas gati një viti luftimesh ndërkufitare të nisura nga Hezbollahu – në mbështetje të aleatit të tij Hamas – pas sulmit të grupit palestinez më 7 tetor 2023 në Izraelin jugor.
