Shkup, 1 shtator, argument.mk/ – Ministri i Punëve të Brendshme, Pançe Toshkovski, vizitoi sot Akademinë e Policisë, ku zyrtarisht filloi mësimi për 310 nxënësit e parë të gjeneratës së re në Shkollën e Mesme Policore “7 Maj”, e rikthyer pas tri dekadash.
Me nisjen e vitit të ri shkollor, Maqedonia pas 30 vitesh sërish do të ketë gjeneratë nxënësish që do ta përfundojnë arsimin e mesëm me profesionin e policit. Toshkovski u dorëzoi kontratat e shkollimit dhjetë kandidatëve të parë dhe u uroi fillim të mbarë, duke theksuar rëndësinë e këtij momenti për Ministrinë dhe për të ardhmen e policisë.
“Më 1 shtator 2026, pas 30 vitesh nga regjistrimi i fundit, kemi një gjeneratë të re të policëve të ardhshëm që do të diplomojnë në Shkollën e Mesme Policore. Urime të gjithë fëmijëve që u regjistruan”, – tha ministri.
Ai shtoi se gjatë dy viteve të ardhshme nxënësit do të kalojnë një proces arsimor të plotë, ku përveç përkushtimit të tyre, rol të madh do të kenë profesorët, mentorët dhe edukatorët. Toshkovski shprehu bindjen se pas dy vitesh vendi do të krenohet me një numër të ri policësh të diplomuar.
Ministri falënderoi të gjithë ata që kontribuuan në rikthimin e shkollës pas një pune të gjatë:
“Falënderim i madh për të gjithë ata që punuan me mund në dy vitet e fundit, që sot pas 30 vitesh të kemi sërish një Shkollë të Mesme Policore shtetërore.”
Rikthimi i Shkollës së Mesme Policore “7 Maj” është pjesë e procesit për forcimin e kapaciteteve kadrovike dhe arsimore të Ministrisë së Punëve të Brendshme, me synim krijimin e gjeneratave të reja të policëve profesionistë, të trajnuar dhe të përgjegjshëm, të gatshëm për t’u përballur me sfidat e sigurisë moderne dhe për t’u shërbyer qytetarëve dhe shtetit.
