Shkup, 24 tetor – Deklarata e fundit e kryetarit të Komunës së Çairit, Izet Mexhiti, se “nëse ka pajtim të plotë brenda VLEN-it, unë e pranoj ta udhëheq partinë”, ka rikthyer në qendër të debatit politik shqiptar në Maqedoninë e Veriut çështjen e lidershipit dhe unifikimit të koalicionit që doli fitimtar në zgjedhjet e fundit lokale, shkruan Zhurnal.
Izet Mexhiti në krye të VLEN-it?
Ky prononcim nuk është vetëm një qëndrim personal, por një sinjal i qartë politik një ftesë për reflektim të brendshëm dhe përkthim të suksesit elektoral në një strukturë të qëndrueshme partiake. Pas rezultateve pozitive në disa komuna, përfshirë edhe Çairin, VLEN tashmë gjendet përpara një momenti vendimtar të shndërrohet nga një koalicion elektoral në një parti të unifikuar, me një strukturë të qartë dhe lidership të njohur.
VLEN lindi si bashkim i disa subjekteve politike shqiptare, me ide të përbashkëta për ndryshim dhe reformë. Por përtej synimit të përbashkët elektoral, dallimet programore dhe përfaqësimi i interesave të ndryshme lokale kanë mbetur sfida thelbësore. Pikërisht këtu, uniteti që përmend Mexhiti bëhet kusht i domosdoshëm.
Një parti e re, që synon të jetë zëri kryesor i shqiptarëve në Maqedoninë e Veriut, nuk mund të mbështetet vetëm në marrëveshje të përkohshme. Ajo ka nevojë për një identitet politik të qëndrueshëm, një platformë ideologjike të qartë, dhe mbi të gjitha, për një lider që simbolizon balancën dhe konsensusin.
Izet Mexhiti si figurë konsensuale –
Në këtë kontekst, Mexhiti shihet nga shumë analistë si kandidati më i natyrshëm për të marrë drejtimin e VLEN-it. Me një karrierë politike të gjatë dhe të qëndrueshme, ai ka treguar aftësi për të bashkuar rreth vetes mbështetje të gjerë, si në nivel lokal ashtu edhe kombëtar.
Fitorja e tij në Çair, një komunë simbolike për politikën shqiptare, e ka pozicionuar si figurë me legjitimitet demokratikdhe kapacitet për të prodhuar rezultate. Megjithatë, Mexhiti po tregohet i kujdesshëm nuk po kërkon këtë pozitë, por po e lidh pranimin e tij me pajtimin e plotë brenda strukturës. Kjo është një qasje që sinjalizon lidership të matur aspak dominues, por integrues dhe inkluziv.
Nëse VLEN do të arrijë të konsolidohet në një subjekt të vetëm politik, ajo do të bëhet për herë të parë pas shumë vitesh një forcë shqiptare me kapacitet të krahasueshëm me partitë tradicionale. Por procesi i unifikimit kërkon sakrificë politike, besim reciprok dhe vizion afatgjatë.
Në këtë fazë, çdo ndarje apo rivalitet i brendshëm do të ishte fatal, pasi do të rrëzonte besimin që elektorati shqiptar sapo ka filluar të rivendosë tek alternativa e re.
Një mundësi historike për politikën shqiptare në RMV –
VLEN ndodhet në një pikë historike me mundësinë për të kaluar nga “bashkimi për zgjedhje” në “bashkim për vizion”.Nëse brenda këtij procesi arrihet një pajtim i plotë dhe Mexhiti pranon të marrë drejtimin gjë që e ka pohuar se do ta pranojë këtë përgjegjësi, kjo mund të shënojë fillimin e një etape të re të përfaqësimit politik shqiptar më të organizuar, më të qëndrueshëm dhe më të besueshëm për qytetarët.
Ndryshe, nuk është vetëm çështje e emrit të liderit, por e modelit të lidershipit që VLEN zgjedh të ndërtojë një lidership që bashkon dhe jo që ndan. Nëse ky model merr formë nën drejtimin e Mexhitit, VLEN mund të bëhet jo vetëm një forcë politike, por një standard i ri për politikën shqiptare në Maqedoninë e Veriut. Kjo mbase do t’i ndihmojë VLEN-it edhe në raport me partneritetin qeveritar ku nuk ka më hapësirë për “ping pong”. argument.mk/
