Shkup, 1 qershor, Zhurnal.mk – Koalicioni VLEN ka reaguar ndaj kritikave të BDI-së lidhur me çështjen e provimit të jurisprudencës në gjuhën shqipe, duke akuzuar ish-ministrat e Drejtësisë nga kjo parti se për vite me radhë nuk kanë arritur të sigurojnë realizimin e kësaj kërkese.
Në reagimin e tyre, nga VLEN thonë se përgjegjësia për moszgjidhjen e këtij problemi nuk bie vetëm mbi një emër, por mbi disa ministra të Drejtësisë që kanë drejtuar dikasterin në periudha të ndryshme. Sipas tyre, krahas emrave si Blerim Bexheti, Adnan Jashari dhe Valdet Xhaferi, pjesë e kësaj liste është edhe ish-ministri i Drejtësisë, Bilen Saliji.
VLEN vlerëson se gjatë mandatit të Salijit nuk është bërë asnjë hap konkret për mundësimin e dhënies së provimit të jurisprudencës në gjuhën shqipe, pavarësisht se ai ka pasur mundësinë ta adresojë këtë çështje si ministër i Drejtësisë.
Në reagim përmendet edhe dorëheqja e Salijit pas rastit të të ndjerit Almir Aliu, për të cilën VLEN pretendon se është paraqitur nga BDI-ja si akt moral, ndërsa kritikon faktin se ai më pas ka vazhduar të mbajë pozita publike.
Koalicioni opozitar ndaj BDI-së thekson se ish-ministri duhet të sqarojë pse gjatë kohës sa drejtonte Ministrinë e Drejtësisë nuk është avancuar procesi për organizimin e provimit të jurisprudencës në gjuhën shqipe.
Nga VLEN shtojnë se qytetarët dhe studentët shqiptarë presin zgjidhje konkrete për këtë çështje dhe se, sipas tyre, zgjidhja do të vijë përmes nismave që aktualisht po ndërmerren nga përfaqësuesit e këtij koalicioni në qeveri.
