Shkup, 2 shtator, argument.mk/ – VMRO‑DPMNE reagoi ndaj konferencës për shtyp të Jon Frçkoskit nga SDSM, duke i cilësuar akuzat si “gënjeshtra të ricikluara” dhe duke theksuar se nuk ekziston asnjë provë për korrupsion apo ndikim të paligjshëm në tenderët e Ministrisë për Transformim Digjital.
Nga partia thonë se në rastin e sistemit për menaxhimin e dokumenteve (DMS), faktet janë të kundërta nga pretendimet e opozitës. “Nga një sistem i trashëguar dhe jofunksional, sot DMS përdoret aktivisht nga mbi 45 institucione, duke siguruar menaxhim elektronik dhe gjurmë të qarta për çdo dokument”, theksohet në reagim.
VMRO‑DPMNE shton se të gjitha procedurat e prokurimeve publike zhvillohen sipas ligjit, përmes sistemit elektronik dhe komisioneve profesionale, pa asnjë ankesë të dorëzuar. Ata akuzojnë SDSM se po tenton të paraqesë supozime politike si vendime gjyqësore.
Në reagim theksohet se Ministria për Transformim Digjital ka rritur numrin e shërbimeve elektronike nga 120 në 352, përdoruesit nga 110.000 në mbi 266.000 dhe kërkesat e dorëzuara nga 64.000 në mbi 340.000, ndërsa progresi i vendit në transformimin digjital dhe sigurinë kibernetike është konfirmuar në raporte ndërkombëtare.
