Shkup, 14 gusht – Ministria e Punëve të Jashtme njoftoi se Ambasada e Maqedonisë së Veriut në Brazil është në kontakt me autoritetet boliviane, pas informacioneve nga mediat serbe për vrasjen e tre personave në Bolivi – dy shtetas serbë dhe një shtetas i Maqedonisë. Për konfirmimin e identitetit pritet përfundimi i autopsisë.
“Pas marrjes së të dhënave zyrtare për viktimat dhe rrethanat, MPJ do ta informojë opinionin publik”.
Mediat serbe raportojnë se në një ekzekutim mafioz është vrarë shtetasi i Maqedonisë Dejanço L. dhe dy serbë nga Nishi.
Sipas raportimit, trupat e viktimave u gjetën të mbështjellë me qese plastike të zeza.
Sipas informacioneve jozyrtare të publikuara nga “Politika”, të tre viktimat ishin torturuar brutalisht para se të ekzekutoheshin.
