Shkup, 27 qershor – Një grup profesorësh nga Universiteti “Nënë Tereza” në Shkup kanë reaguar ndaj komunikimeve të fundit publike të menaxhmentit të këtij institucioni, të cilat, sipas tyre, përmbajnë elemente propagandistike dhe përpjekje për vetëlavdërim pa bazë të qëndrueshme akademike, shkruan zhurnal.mk.
Në një njoftim për redaksinë tonë, profesorët kritikojnë mënyrën e prezantimit të pjesëmarrjes së stafit të universitetit në disa konferenca ndërkombëtare, kryesisht të organizuara nga IEEE, duke theksuar se kjo është portretuar si arritje madhore për kërkimin shkencor të institucionit, pa pasur mbështetje në fakte të matshme ndërkombëtarisht.
“Si pjesë e komunitetit akademik të këtij universiteti, ndjejmë obligimin profesional dhe moral të sqarojmë se një gjuhë kaq pompoze dhe vetëlavdëruese, në mungesë të fakteve të qëndrueshme, dëmton më shumë sesa ndihmon reputacionin e një institucioni që ende është në fazat fillestare të konsolidimit akademik,” thuhet në deklaratë.
Performanca e vërtetë akademike: Numrat flasin vetë
Profesorët referojnë të dhëna të publikuara në AD Scientific Index 2025, sipas të cilave Universiteti “Nënë Tereza” renditet i teti në nivel kombëtar, ndërsa në rang botëror zë vendin #14,589, duke munguar tërësisht në listat prestigjioze evropiane.
Ndërkaq, në renditje të tjera si EduRank dhe UNIRANKS, UNT nuk përfshihet në mesin e pesë universiteteve më të mira në Maqedoninë e Veriut, dhe në disa raste ka status të “inaktiv” ose me vlerësime margjinale.
“Institucioni ynë mungon në të gjitha rangimet kryesore ndërkombëtare si: Shanghai ARWU, Times Higher Education (THE), QS World University Rankings dhe SCImago, që konsiderohen standardet globale për matjen e cilësisë universitare,” theksojnë autorët e reagimit.
Konferencat – pjesëmarrje, jo patjetër sukses
Në deklaratë saktësohet se pjesëmarrja në konferenca, përfshirë ato të IEEE-së, nuk përbën vetvetiu sukses shkencor, duke qenë se nuk garanton as cilësi, as impakt, as citueshmëri të punimeve.
“Asnjë nga punimet e përmendura nuk është publikuar në revista të indeksuara në Scopus apo Web of Science, dhe as nuk kanë sjellë citime të matshme që të dëshmojnë ndikim akademik në fushat përkatëse,” thuhet më tej.
Thirrje për standarde më të larta dhe integritet akademik
Në vend të përmbylljes, profesorët bëjnë thirrje për një qasje më të matur dhe të bazuar në kritere shkencore ndërkombëtare në mënyrën si prezantohen rezultatet akademike:
- Komunikimet institucionale të bazohen në të dhëna reale dhe të verifikueshme
- Prioritet t’i jepet cilësisë së kërkimit, jo vetëm pjesëmarrjes në ngjarje
- Të synohen botime në revista me faktor impakti dhe të krijohen ekipe kërkimore të mirëfillta
- Të ndërtohet një kulturë akademike me integritet, larg propagandës dhe marketingut të zbrazët“Shkenca nuk matet me fjalë. Shkenca matet me fakte. Dhe faktet flasin vetë,” përfundon deklarata e profesorëve.
