Të premten paradite, presidenti kinez Xi Jinping u takua në Pekin me homologun e vet ekuadorian Daniel Noboa, i cili ka shkuar në Kinë për të marrë pjesë në Forumin e Davosit Veror.
Xi theksoi që sivjet është 45-vjetori i vendosjes së marrëdhënieve diplomatike midis Kinës e Ekuadorit dhe prirja e zhvillimit të marrëdhënieve dypalëshe është e mirë. Ekuadori i është bashkuar familjes së vendeve pjesëmarrëse në nismën “Një brez, një rrugë” dhe të dyja palët kanë nënshkruar marrëveshje të tregtisë së lirë e kanë kryer bashkëpunim të frytshëm në fushat e energjisë, minierave, ndërtimit të infrastrukturës etj. Kina gjithmonë i ka parë dhe i ka zhvilluar marrëdhëniet me Ekuadorin nga një lartësi strategjike e perspektivë afatgjatë dhe është e gatshme të punojë me Ekuadorin për të nxitur thellimin dhe zbatimin e marrëdhënieve të partneritetit të gjithanshëm strategjik dypalësh e për të sjellë më shumë përfitime për popujt e të dy vendeve.
Kreu i shtetit kinez u shpreh më tej se Kina dhe Ekuadori duhet të zbatojnë projektet kyçe të bashkëpunimit, të promovojnë arritjen e rezultateve konkrete dhe të nxitin një nivel të ri në tregtinë dypalëshe, të forcojnë shkëmbimet arsimore, kulturore, mediatike, rinore e në fusha të tjera, si edhe të thellojnë mësimin e ndërsjellë.
Ndërsa Novoa tha nga ana e tij që Kina ka pasur arritje të jashtëzakonshme në fushën e zhvillimit, të cilat janë të admirueshme. Ekuadori dhe Kina prej kohësh i janë përmbajtur respektit të ndërsjellë, barazisë e përfitimeve të ndërsjella dhe kanë kryer me sukses një bashkëpunim të gjerë. Ekuadori nuk do ta harrojë kurrë mbështetjen dhe ndihmën e fortë që i ka dhënë Kina për zhvillimin ekonomik e shoqëror dhe mirëpret thellimin e vazhdueshëm të marrëdhënieve dypalëshe, forcimin e shkëmbimeve ekonomike e tregtare, si edhe shtimin e bashkëpunimit në shkencë e teknologji, në kulturë, arsim, shkëmbimet rinore dhe fusha të tjera, për të sjellë përfitime më të mëdha për popujt e të dy vendeve.
Pas takimit, të dy krerët e shtetit morën pjesë së bashku në nënshkrimin e “Planit të bashkëpunimit ndërmjet qeverisë së Republikës Popullore të Kinës dhe qeverisë së Republikës së Ekuadorit për promovimin e përbashkët të ndërtimit të ‘Një brez, një rrugë”
