Shkup, 15 korrik – Ministri i Punëve të Jashtme dhe Tregtisë së Jashtme, Timço Mucunski, prej nesër me ftesë të sekretarit shtetëror të punëve të jashtme, Komonvelt dhe zhvillim të Mbretërisë së Bashkuar të Britanisë së Madhe dhe Irlandës Veriore, Dejvid Lami, do të qëndrojë për vizitë treditëshe në Mbretërinë e Bashkuar.
Siç kumtoi MPJTJ, në kuadër të vizitës, përveç takimit me nikoqirin e tij, sekretarin Lami, është parashikuar Mucunski të takohet edhe me nënsekretarin shtetëror parlamentar dhe ministrin për shërbime, biznese të vogla dhe eksport në Ministrinë për biznes dhe tregti, Garet Tomas. Gjithashtu, në forumin e biznesit të organizuar nga Ambasada e Republikës së Maqedonisë së Veriut në Londër, ministri do t’i prezantojë potencialet ekonomike dhe mundësitë për investime në vend para disa kompanive amerikane.
Në Parlamentin Britanik, ministri Mucunski do të takohet me anëtarët e Grupit Parlamentar për Bashkëpunim me Republikën e Maqedonisë së Veriut, ndërsa në think-thenkun e njohur “British Foreign Policy Group” do të ketë një fjalim dhe diskutim mbi rolin e Maqedonisë së Veriut në sigurinë euroatlantike dhe stabilitetin rajonal, thuhet në kumtesë.
Qëllimi i vizitës, siç thonë nga Ministria e Punëve të Jashtme dhe Tregtisë të Jashtme, është intensifikimi i marrëdhënieve të përgjithshme dypalëshe duke forcuar dialogun politik dhe duke thelluar bashkëpunimin ekonomik midis dy vendeve, veçanërisht pas nënshkrimit të marrëveshjes së partneritetit të investimeve. Fokusi i bisedimeve do të jetë në avancimin e marrëdhënieve dypalëshe, integrimin e Maqedonisë së Veriut në BE, si dhe shkëmbimin e pikëpamjeve mbi çështjet kryesore rajonale, evropiane dhe globale.
