Përpjekjet e Bankës së Shqipërisë për të normalizuar kursin e këmbimit duke blerë euro në tregun e brendshëm e kanë çuar nivelin e rezervës valutore në nivelin e 6.7 miliardë eurove.
Të dhënat nga Banka e Shqipërisë flasin për një zgjerim të kësaj vlere me të paktën 21%, krahasuar me majin-qershor të vitit 2024.
Rezerva valutore e vendit në pjesën më të madhe mbahet në tituj borxhi dhe në depozita, ndërkohë që administrohet nga Banka e Shqipërisë. Referuar shifrave, letrat me vlerë arritën në nivelin e 493.7 mlrd lekëve, ndërsa depozitat pësuan një rritje të ndjeshme me të paktën 427 mln lekë krahasuar me një vit më parë.
Nga ana tjetër, Banka e Shqipërisë raporton se për muajin qershor të këtij viti rezerva e arit arriti në vlerën e 304 mln euro, me një rritje prej 28% krahasuar me qershorin e vitit të kaluar.
Deri në fund të këtij viti, rezerva valutore planifikohet të arrijë në 7.3 miliardë euro. Tv Klan
