Shkup, 9 nëntor – Enti Shtetëror i Statistikave ka publikuar të dhënat për muajin tetor, sipas të cilave indeksi i kostove të jetesës ka shënuar një deflacion të lehtë prej 0,2% krahasuar me shtatorin. Kjo rënie u shkaktua kryesisht nga ulja e çmimeve të transportit (–6,1%), si dhe nga mobilimi dhe mirëmbajtja e amvisërisë (–0,3%), ndërsa arsimi dhe kultura kanë shënuar një ulje më të vogël prej 0,1%. Edhe indeksi i çmimeve me pakicë ka shënuar një rënie të lehtë, duke arritur në 98,7 pikë.
Megjithatë, kjo rënie mujore e vogël nuk e ndryshon trendin vjetor të rritjes së çmimeve. Krahasuar me tetorin e vitit 2024, indeksi i kostove të jetesës është rritur me 4,5%, ndërsa indeksi i çmimeve me pakicë me 2,8%, çka tregon se qytetarët ende përballen me presion të lartë inflacionar.
Rritja më e dukshme e çmimeve është regjistruar te ushqimet dhe pijet joalkoolike (+7%), pijet alkoolike dhe duhani (+6,7%), si dhe veshjet dhe këpucët (+2,8%). Janë vërejtur gjithashtu rritje të vogla mujore te banimi, uji, energjia elektrike dhe gazi, si dhe te restorantet dhe hotelet, me një mesatare prej rreth 0,2%.
Sipas të dhënave të fundit, shporta minimale sindikale në tetor është rritur me 467 denarë, dhe për një familje mesatare me katër anëtarë, shpenzimet mujore kanë arritur në 65.544 denarë. Pjesa më e madhe e rritjes i takon ushqimit dhe pijeve, të cilat kanë arritur në 23.772 denarë, me një rritje prej 378 denarësh brenda vetëm një muaji.
