Nicole Varnes vizitoi Manastirin, fokus bashkëpunimi ekonomik dhe inovacioni

Manastir, 07 maj, Zhurnal.mk – Ambasadorja e Shteteve të Bashkuara të Amerikës në Maqedoninë e Veriut, Nicole Varnes, realizoi një vizitë në Manastir, ku zhvilloi takime me përfaqësues institucionalë, akademikë dhe të biznesit.

Gjatë vizitës, Varnes vizitoi kompaninë Sinpeks Agro, distributore e pajisjeve bujqësore të “John Deere“, ku u diskutua për forcimin e marrëdhënieve tregtare ndërmjet SHBA-ve dhe Maqedonisë së Veriut, si dhe për ndikimin e teknologjisë dhe inovacionit amerikan në zhvillimin e sektorit bujqësor, shkruan Zhurnal.mk.

Ajo vizitoi edhe American Corner Bitola, ku u takua me të rinj, sipërmarrës dhe inovatorë që marrin pjesë në programin “IW Connect Software Development Life Cycle”. Në fokus të diskutimeve ishte roli i shkencës dhe teknologjisë amerikane në zhvillimin e inovacionit global.

Në kuadër të vizitës, Varnes realizoi takim edhe me kryetarin e komunës së Manastir, Toni Konjanovski, si dhe me dekanin e Fakultetit të Teknologjive Informatike dhe Komunikimit, Blagoj Ristevski.

Nga ambasada amerikane vlerësuan mikpritjen dhe bashkëbisedimet e zhvilluara gjatë vizitës në Manastir, duke theksuar rëndësinë e bashkëpunimit në ekonomi, arsim dhe teknologji.