Tiranë, 19 maj, Zhurnal.mk – Zëvendëskryeministrja Albana Koçiu mori pjesë në Forumin Botëror Urban 2026, (World Urban Forum 2026), të zhvilluar në Baku, Azerbajxhan, ku liderë botërorë, përfaqësues të institucioneve ndërkombëtare, ekspertë dhe politikëbërës diskutuan mbi sfidat dhe zgjidhjet që lidhen me urbanizimin, zhvillimin e qëndrueshëm dhe të ardhmen e qyteteve.
Në një postim në rrjetet sociale Koçiu tha se ky forum ishte një pikëtakimi i vizioneve dhe ideve që synojnë qytete më të jetueshme, më inteligjente dhe më pranë qytetarëve.
Në këtë forum Koçiu theksoi rëndësinë e ndërtimit të qyteteve të sigurta, rezistente dhe gjithëpërfshirëse përballë sfidave globale të strehimit, urbanizimit dhe ndryshimeve klimatike.
Gjithashtu Koçiu prezantoi prioritetet e Shqipërisë për zhvillimin urban të së ardhmes, të fokusuara në forcimin e rezistencës ndaj ndryshimeve klimatike, investimet në cilësinë urbane dhe avancimin e iniciativës “Smart City”, përmes përdorimit të teknologjisë dhe sistemeve inteligjente.
“Shqipëria është sot një shembull konkret se si vizioni politik dhe investimet strategjike transformojnë qytetet dhe modelin ekonomik të vendit”, tha Koçiu gjatë punimeve të forumit.
Forumi Botëror Urban 2026 është një nga platformat më të rëndësishme ndërkombëtare kushtuar zhvillimit urban, strehimit dhe qëndrueshmërisë së qyteteve.
