Tiranë, 01 qershor, Zhurnal.mk – Kryeministri Edi Rama, njëherësh kryetar i Partisë Socialiste reagoi sot lidhur me situatën e krijuar për investimin e zonës së Zvërnecit, ndërsa e konsideroi të neveritshëm aktin e tërheqjes zvarrë të njërit prej protestuesve.
Në mbledhjen e grupit parlamentar të Partisë Socialiste, Rama i dërgoi një mesazh të drejtpërdrejtë të gjithë atyre që janë revoltuar dhe janë rreshtuar edhe kundër tij personalisht, pasi panë aktin e neveritshëm.
“Ju kam dëgjuar, ju kam lexuar dhe ju kuptoj shumë mirë, madje ju siguroj se në vendin tuaj dhe unë po njësoj do të revoltohesha dhe do të rreshtohesha kundër qeverisë dhe kundër kryeministrit”, tha Rama.
Sipas tij, është e tmerrshme që disa roje private sigurie në sytë e Policisë së Shtetit, pas një gardhi me tela me gjemba, të ulërinin si kafshë dhe të merrnin nga jashtë brenda një njeri në të drejtën e vetë.
“Ta tërhiqnin zvarrë nëpër plazhin e rrethuar e pastaj Polica të thoshte që i zvarrituri u fut vetë në pronën private dhe në këtë mënyrë ta relativizonte dhunën. Ndërkohë që duhet t’i kishte arrestuar aty në vend ata që morën zvarrë protestuesin”, shtoi Rama.
Kryeministri theksoi se i mirëkupton të gjithë ata që kanë reaguar dhe mbase duke pasur parasysh se çfarë ka bërë kur ishte në anën tjetër të barrikadës do të kishte bërë edhe më keq se ata.
“Do të kisha bërë edhe më keq se ju po të më thoshin se ajo tokë është e shtetit dhe shteti po ua fal të huajve. Madje kam vënë re se është përhapur gjithandej me shumë helm nga pas edhe legjenda se shteti po ia fal atë tokë Izraelit për të sjellë palestinezët në Zvërnec”, vijoi Rama.
“Do të kisha bërë më keq po të më thoshin se aty janë futur disa rusë që në bashkëpunim me oligarkët shqiptar do të rrafshojnë zonën e mbrojtur dhe ndërtojnë pallate; po të më thoshin se ajo ishte zonë e mbrojtur dhe qeveria e hoqi nga mbrojtja për ta falur tek të huajt që do vijnë për të shkatërruar biodiversitetin e zonës; po të më thoshin se në vend të flamingove dhe breshkave të ujit aty do të pastrohen para të e zeza të mafias ndërkombëtare”, u shpreh Rama.
