Shkup, 29 qeryhor, Zhurnal.mk – Ministri i Jashtëm i Lituanisë, Kęstutis Budrys, deklaroi sot në Shkup se “tani është momenti për zgjerim”, por homologu i tij maqedonas, Timço Mucunski, më pas tha se për Maqedoninë ndoshta nuk është pikërisht momenti. Ai, për të disatën herë, përsëriti të njëjtat qëndrime – se Maqedonia është e gatshme të vazhdojë rrugën evropiane, por se qeveria pret garanci të qarta se procesi do të zhvillohet pa bllokada të reja dhe me më shumë parashikueshmëri. Nuk është e qartë kush duhet t’i japë ato garanci.
Mucunski u pyet të komentojë deklaratën e Budrysit për zgjerimin, dhe ja përgjigjja e tij, siç e transmeton MIA. Opinioni publik duhet të përpiqet të kuptojë çfarë synon të thotë ministri Mucunski:
“Çfarë sigurish mund të marrë shteti ynë, ose garanci, se nuk do të përballemi me bllokada të përhershme nga një vend anëtar. Sepse ajo që është e dukshme, edhe në lidhje me të ashtuquajturin konsensus të vitit 2022, ka interpretime të ndryshme që vijnë nga 26 vendet anëtare, institucionet evropiane dhe një vend anëtar. Përsëri do të përsëris, jo se ne si shtet kemi rezistencë, jemi të vetëdijshëm, dhe në të gjitha deklaratat tona, jo vetëm nga unë, por edhe nga presidentja e shtetit, nga kryeministri, themi se do të marrim pjesë në këtë proces. Sidomos pas samitit në Tivat, tashmë ndihet energjia për lëvizje përpara. Nuk ka asnjë dilemë tek ne. Por ne nuk do të lejojmë të realizohet ai rrezik, që ne t’i bëjmë ato hapa, e sërish të kemi bisedime të këtij lloji, konferenca të këtij lloji, ku do të gjendemi në situatë që një vend anëtar të mos jetë korrekt.”
Ministri lituanez Budrys tha se momenti për zgjerimin e Bashkimit Evropian është tani dhe duhet të shfrytëzohet.
Ai vlerësoi se ekziston vullnet i qartë politik për vazhdimin e procesit të zgjerimit, por se vendet kandidate duhet t’i përmbushin detyrimet e marra, paralelisht me tejkalimin e sfidave politike dhe bilaterale.
“Do të jem shumë i qartë për këtë. Ky është një momentum që duhet shfrytëzuar. Të gjithë e kuptojmë se zgjerimi i BE‑së tani udhëhiqet nga nevoja gjeopolitike. Faktori kryesor dhe i madh pse jemi kaq të fokusuar është lufta kundër Ukrainës. Ka pasur një pauzë në proces, ka pasur diskutime thelbësore nëse është i nevojshëm, nëse jemi gati apo jo, ndoshta na duhen reforma institucionale ndërkohë. Tani ka një kuptim të qartë gjeopolitik se zgjerimi është i domosdoshëm dhe duhet të vazhdojë”, tha ai.
Budrys theksoi se dialogu me Bullgarinë duhet të vazhdojë me mbështetjen e vendeve anëtare dhe institucioneve evropiane.
“Ne nuk jemi naivë. Dhe nuk jemi aq besimplotë sa të mendojmë se papritur do të ketë ndonjë ndryshim të madh nga ana e Bullgarisë në një pozicion që është mjaft agresiv dhe radikal. Prandaj duhet ta shfrytëzojmë periudhën e ardhshme për të gjetur mënyra në nivel diplomatik për të ulur tensionet dhe për të vazhduar bisedimet mbi bazë vlerash dhe parimesh”, tha ai.
Sa i përket notës diplomatike të lidhur me familjen e kryeministrit Hristijan Mickoski, Mucunski tha se pret që hetimi të kryhet “aty ku e dinë më së miri”, duke shtuar se nga pikëpamja zyrtare tema konsiderohet e mbyllur.
Mucunski dhe Budrys në konferencën e përbashkët për media deklaruan se marrëdhëniet bilaterale janë të shkëlqyera dhe se mund të avancohen në bashkëpunimin ekonomik dhe tregtar. U theksua se hapja e ambasadës së Maqedonisë së Veriut në Vilnius është një hap i rëndësishëm për forcimin e partneritetit, ndërsa Lituania mbetet mbështetëse e fortë e procesit eurointegrues të vendit.
