Shkup, 1 korrik, Zhurnal.mk – Kryeministri Hristijan Mickoski sot deklaroi se tashmë i ka marrë propozimet e VREDI dhe ZNAM për ministrat e rinj në qeverinë e rikonstruuar, se për të ato propozime janë plotësisht të pranueshme dhe se pret punë më të suksesshme nga përbërja e re qeveritare.
“Po, i kam propozimet për ministrat e rinj nga VREDI dhe nga partia ZNAM, por do t’i lë ata t’i bëjnë publike, të mos i them unë. Për mua ato propozime janë krejtësisht në rregull dhe pres që të kemi punë edhe më të suksesshme në përbërjen e re të Qeverisë”, theksoi Mickoski, duke iu përgjigjur pyetjes së gazetarëve gjatë vizitës në Komunën e Kisella Vodës.
Kryeministri nënvizoi se VREDI në qeverinë e rikonstruuar do të marrë pozitat ministrore në Ministrinë e Drejtësisë, në Ministrinë e Marrëdhënieve Ndërmjet Komuniteteve dhe në Ministrinë e Kulturës dhe Turizmit.
Sipas publikimeve në media, nga radhët e VREDI‑t për ministër të Kulturës dhe Turizmit është propozuar Sedat Sulejmani, i cili deri tani ishte zëvendësministër në të njëjtin resor.
Ministrinë e Marrëdhënieve Ndërmjet Komuniteteve do ta drejtojë Agon Ferati, ndërsa për ministër të ri të Drejtësisë është propozuar profesori i së drejtës kushtetuese në Universitetin e Evropës Juglindore, Jeton Shasivari, i cili do ta pasojë Igor Filkovin.
Propozimi për përbërjen e re të rikonstruuar të Qeverisë pritet të dërgohet në Kuvend deri të premten, ndërsa më së voni deri në mesin e korrikut të zgjidhet përbërja e re qeveritare.
