Shkup, 1 korrik, Zhurnal.mk – Informacioni fillestar ishte se kishim mbyllur katërmbëdhjetë institute, ndërsa tani numri është 18. Fatkeqësisht, edhe kjo ndodhi në Maqedoni — shembulli më brutal është se gjetëm një institut të regjistruar në një dhomë brenda një kazinoje. Por nuk është vetëm kaq: ka institute të regjistruara në banesa, ka hapësira të regjistruara si institute nëpër dyqane e të ngjashme. Nuk është aq problem vetë lokacioni, përveç rastit të kazinosë. Instituti, që të funksionojë, duhet të plotësojë kushte të caktuara ligjore dhe të prodhojë punë shkencore‑kërkimore. Mund të ketë edhe punë aplikative, por parësore duhet të jetë prodhimi i punës shkencore‑kërkimore deklaroi ministrja e Arsimit, Vesna Janevska, në emisionin “Za ili protiv” në Alfa TV, me gazetarin Ljupço Cvetanovski, lidhur me mbylljen e instituteve.
Mungesa e vlerësimeve dhe roli i Agjencisë për Cilësi
“Diçka e tillë nuk ka ndodhur më parë. Me kënaqësi mund të them se tani më në fund na ndihmon edhe Agjencia për Cilësi në Arsimin e Lartë. Për vite me radhë, deri në ardhjen e drejtoreshës së re, Hristina Serafimovska, nuk ishte bërë asnjë vlerësim i vetëm për institute, fakultete apo universitete, edhe pse ligji e kërkonte këtë. Që nga ardhja e saj, janë bërë shumë vlerësime me përfshirjen e ekspertëve të huaj, që të shmangim çdo dyshim për favorizim. Tani kemi vlerësime dhe afatet po ecin do të ketë mbyllje edhe të disa fakulteteve dhe disa universiteteve private”,
theksoi Janevska.
Kufizimi i studimeve private në fusha me interes të lartë publik
Sipas Janevskës, me ligjin e ri janë kufizuar studimet private në fusha me interes të fortë publik (juridike, mjekësore dhe të ngjashme), me qëllim sigurimin e kuadrit profesional dhe cilësisë në arsimin e lartë. Paralelisht, Inspektorati Shtetëror i Arsimit ka kryer kontrolle edhe në disa fakultete shtetërore; pas konstatimit të parregullsive, institucionet marrin procesverbal dhe duhet të respektojnë dispozitat ligjore.
“Me ligjin e ri, në njëfarë mënyre i pamundësuam studimet juridike, mjekësore dhe të tjera në sektorin privat, aty ku ka interes të fortë publik, ku shteti varet nga ekspertët që prodhon ai fakultet. Kështu e lehtësojmë procesin për të arritur cilësi në arsimin e lartë. Ndërkohë, edhe në fakultetet shtetërore kemi bërë disa vlerësime, ose Inspektorati ka hyrë për kontroll, aty ku zakonisht marrim ankesa. Kur konstatojmë parregullsi, veprojmë sipas ligjit dhe fakultetet i respektojnë dispozitat pasi të marrin procesverbalin”, tha Janevska.
Proces i ngadalshëm, por në drejtimin e duhur
Sipas saj, procesi është i ngadalshëm, por i rëndësishëm, sepse institucionet po kuptojnë se ka kontroll dhe se duhet të prodhojnë kuadër të duhur.
“Po ecim relativisht mirë, edhe pse procesi është i ngadalshëm. Nuk ka rëndësi sa ngadalë ecën, rëndësi ka që lëvizim në drejtimin e duhur. Rëndësi ka që njerëzit kuptuan se do të ketë kontroll. Rëndësi ka që studentët kuptuan se duhet të mësojnë dhe se nuk mund të sillen jashtë ligjit. Asnjë universitet nuk mund të funksionojë jashtë ligjit. Kjo është një mesazh i mirë që po dërgojmë dhe presim që ata që do të mbeten të funksionojnë, të harmonizohen me zgjidhjet ligjore dhe të fillojnë të prodhojnë kuadër të duhur”, theksoi ministrja.
Ajo shtoi se disa shtete fqinje janë ankuar verbalish se cilësia e një pjese të studentëve të diplomuar në Maqedoni “nuk është në nivelin e duhur”.
“Kemi zgjidhje të mira ligjore dhe besoj se zbatimi i tyre do ta zgjidhë edhe këtë problem”, përfundoi Janevska.
