Shkup, 1 korrik, Zhurnal.mk – Kryetari i Qytetit të Shkupit, Orce Gjorgjievski, informoi se pas motit të rëndë që sot e përfshiu kryeqytetin, Shtabi i Krizave, së bashku me ekipet e ndërmarrjeve publike, është plotësisht i mobilizuar dhe i gatshëm për ndërhyrje të shpejtë në terren.
Ai theksoi se shërbimet e qytetit janë në koordinim të vazhdueshëm me Qendrën për Menaxhim me Kriza, Ministrinë e Punëve të Brendshme, EVN, Brigadën e Zjarrfikësve të Qytetit të Shkupit dhe institucionet e tjera kompetente, me qëllim që të reagojnë me kohë në rast të përmbytjeve, dëmeve ose pasojave të tjera nga moti i keq.
Sipas Gjorgjievskit, të gjitha kapacitetet e disponueshme janë vënë në funksion, ndërsa ekipet do të mbeten në terren gjatë gjithë natës dhe do të ndërhyjnë kudo ku do të ketë nevojë.
Njëkohësisht, ai u bëri apel qytetarëve të jenë të kujdesshëm, të qetë dhe të bashkëpunojnë me shërbimet kompetente, duke theksuar se, edhe pse moti i keq nuk mund të parandalohet, me reagim të organizuar dhe të shpejtë mund të zvogëlohen pasojat e tij.
