Shkup, 2 korrik, Zhurnal.mk – LSDM në koalicion me Levicën kanë dorëzuar 13 mijë amendamente me qëllim të pengojnë votimin e bashkatdhetarëve në diasporë, nga frika se nuk e kanë besimin e tyre – dhe kjo është një mesazh i fortë drejtuar diasporës. Shpresoj që më në fund Koalicioni LSDM – Levica të guxojnë, t’i lënë mënjanë motivet e tyre politike, të kthehen në Parlament; ende ka kohë që ta dorëzojmë këtë reformë. Jam i bindur se interesat politike do t’i lënë anash dhe si prioritet do t’i vendosin interesat kombëtare, deklaroi sot kryeministri Hristijan Mickoski, duke iu përgjigjur pyetjes së gazetarëve lidhur me miratimin e Kodit Zgjedhor.
“Së pari, LSDM kur ishte në pushtet, me katastrofën dhe kolapsin që solli në Maqedoni, motivoi dhe detyroi një pjesë të madhe të qytetarëve tanë të kërkojnë fatin jashtë vendit, ndërsa tani i ndëshkon për herë të dytë. Nuk u lejon të marrin pjesë në zgjedhje legjitime presidenciale. Nëse kanë frikë për zgjedhjet parlamentare, ne u themi: për zgjedhjet e ardhshme presidenciale e më tej, t’u jepet mundësi diasporës të votojë në mënyrë elektronike. Nuk është e vërtetë ajo që u tha ditëve të fundit për shembullin e Francës; mund t’ju përmend shumë shembuj të tjerë të aplikuar edhe në rajon”, tha Mickoski.
Ai shtoi se muajt e kaluar ka pasur debat konstruktiv, por në momentin e fundit Levica ka refuzuar ta nënshkruajë propozimin.
“Ajo që bëmë muajt e kaluar ishte debat konstruktiv në kuadër të Parlamentit, aty ku duhet të debatohet. Gjithçka ishte gati, gjithçka e përfunduar, gjithçka e harmonizuar sa i përket Kodit Zgjedhor. Në momentin e fundit, partia politike Levica refuzoi të nënshkruajë propozimin për deputetët, pra refuzoi të nënshkruajë Kodin Zgjedhor që vetë e propozuan, që vetë e harmonizuan, ndërsa ne pranuam gjithçka që kërkonin – gjithçka që ishte në përputhje me sjelljen normale, përfshirë edhe paratë për financimin e fushatës, që ishte prioriteti i tyre kryesor. Të kenë më shumë para për fushatë – ne ua pranuam. Dhe ata thanë: jo, nuk do ta nënshkruajmë. Na premtuan se nuk do të bënin filibustering me amendamente, na thanë: ju votoni, ne do të jemi të përmbajtur, duke dashur të paraqiten sërish rrejshëm para mbështetësve të tyre, sikur janë parimorë e të gjithë të tjerët kundër tyre, duke u viktimizuar, ndërsa në thelb për katër muaj negociuan me të gjitha grupet parlamentare. Kjo është një mesazh për votuesit e tyre: imagjinoni t’u jepni mundësinë të drejtojnë institucione, imagjinoni t’u jepni mundësinë të vendosin për të ardhmen tuaj, kur ju shikojnë në sy dhe ju gënjejnë, ndërsa pas perdeve bëjnë diçka krejt tjetër”, sqaroi Mickoski dhe shtoi:
“Ju kujtohet dëshmia e ish‑kryeministrit Zoran Zaev, kur qartë tha se siguroheshin resurse që Levica të merrte vota nga VMRO‑DPMNE në zgjedhjet parlamentare, e pastaj, nëse fitonin deputetë, duhej të ishin në koalicion me LSDM dhe të mbështesnin qeverinë e tij. Atëherë kryetari i Levicës iku, e tani ikën sërish. Prandaj, mesazh për të gjithë ata që e mbështesin këtë parti politike: nëse për muaj të tërë bëjnë një gjë, e flasin diçka tjetër, imagjinoni çfarë do të bënin nëse u jepet mundësia”.
Kryeministri theksoi se “vija e kuqe” e VMRO‑DPMNE‑së është votimi i diasporës.
“Me të vërtetë më vjen keq. Mesazhi ynë ishte i qartë: thuani çfarë të doni, gjithçka do ta pranojmë, por vija jonë e kuqe është votimi i diasporës, sepse diaspora duhet të ndihet e lidhur me atdheun, sepse qëllimi ynë si Qeveri është që një ditë ta kthejmë diasporën në shtëpi. Shpresoj që më në fund Koalicioni LSDM – Levica të guxojnë, t’i lënë motivet politike, të kthehen në Parlament; ende ka kohë që ta dorëzojmë këtë reformë. Jam i bindur se interesat politike do t’i lënë anash dhe si prioritet do t’i vendosin interesat kombëtare”, tha Mickoski.
