Shkup, 3 korrik, Zhurnal.mk – Sipas LSDM‑së, ajo që paraqitet si platformë për “bashkimin e opozitës” në realitet ka një qëllim krejtësisht të kundërt: shpërbërjen sistematike të opozitës.
“Asnjë kritikë serioze ndaj pushtetit. Asnjë fjalë për korrupsionin, për kolapsin ekonomik, për buxhetin e zbrazët apo për qeverisjen autoritare.
E gjithë energjia është e drejtuar kundër opozitës së vetme – LSDM‑së, e cila me të gjitha forcat lufton kundër grupit të madh të organizuar kriminal që përmes Hristijan Mickoskit ka kontroll të plotë mbi prokurorinë, gjyqësorin dhe policinë, ndërsa përmes Orbanit zotëron mbi 40 për qind të të gjitha mediave në Maqedoni, ndërsa mbi të tjerat ushtron ndikim përmes kërcënimeve dhe financimit.
Të njëjtët njerëz që me vite kanë kontribuar nga brenda në rrënimin e rejtingut të LSDM‑së, tani nga jashtë vazhdojnë ta sulmojnë partinë e tyre.”
Nga partia opozitare vlerësojnë se platforma për të ardhmen e Mickoskit nuk është e re; siç shtojnë, ajo është lansuar që para disa muajsh, vetëm se tani është zyrtarizuar.
“Ashtu siç ndodhi me projektin ZNAM, i cili dështoi plotësisht, tani po krijohet ZNAM 2.0 përmes kësaj platforme.
Modelin e copëtimit të opozitës dhe ndarjes së votave opozitare, Mickoski e ka marrë drejtpërdrejt nga Aleksandar Vuçiçi dhe partia e tij motër SNS.
Në Serbi, Vuçiçi e copëtoi opozitën, e ndau, ndërsa një pjesë edhe e bleu. Mickoski dëshiron të zbatojë të njëjtin model copy‑paste edhe në Maqedoni.
Gjithçka për Mickoskin bëhet nga Beogradi. E vetmja gjë që vjen nga Budapesti janë mediat.
Prandaj është e qartë: kjo nuk është luftë për një të ardhme më të mirë të Maqedonisë. Kjo është projekt i organizuar për dobësimin e opozitës së vetme reale që i kundërvihet krimit të organizuar.”
Fronti i vetëm që lufton kundër kësaj strukture kriminale, theksojnë nga LSDM, është Fronti për të Vërtetën dhe Drejtësinë.
