Tiranë, 03 korrik, Zhurnal.mk – Deputetja e Partisë së Lirisë, Erisa Xhixho, tha sot se libri “The Albanian Files” dëshmon mungesën e transparencës që ka karakterizuar qeverisjen gjatë 13 viteve të fundit, duke hedhur dritë mbi mënyrën se si janë konceptuar projektet e zhvillimit në Shqipëri.
Në një deklaratë për mediat, Xhixho tha se zhvillimi i vendit nuk është orientuar drejt interesit publik, por sipas saj është ndërtuar mbi interesa të ngushta dhe pazare politike.
Ajo tha se skema ka funksionuar duke nisur me marrjen e pronës publike, ndryshimin e ligjeve dhe më pas kalimin e pronave në favor të klientëve të pushtetit.
Sipas deputetes, situata ka shkuar edhe më tej, pasi nuk preken më vetëm pronat publike, por edhe ato private dhe zonat e mbrojtura.
Xhixho ngriti dyshime mbi faktin se disa projekte, të përfshira në librin “The Albanian Files”, janë hartuar disa vite përpara ndryshimeve ligjore për zonat e mbrojtura.
“Nëse është pronë private, pronari nxirret zvarrë nga prona e tij. Nëse është zonë e mbrojtur, ndryshohet ligji vetëm për t’i hapur rrugë pazareve të paracaktuara. Alarmi është fakti se shumë prej këtyre projekteve janë hartuar dy apo tre vite përpara se të ndryshohej ligji për Zonat e Mbrojtura. Kjo nuk është rastësi. Askush nuk investon miliona euro për një projekt që e di se nuk mund të ndërtohet. Dikush u kishte garantuar se ligji do të ndryshohej. Ky është thelbi i kapjes së shtetit! Kur ligjet nuk hartohen për qytetarët, por për një grusht njerëzish që ndajnë fitimet me pushtetin dhe kemi korrupsion shtetëror në formën e tij më të rëndë”, tha Xhixho.
Xhixho gjithashtu parashtroi një sërë pyetjesh drejtuar Kryeministrit, Kuvendit të Shqipërisë, institucioneve shtetërore si dhe organeve të drejtësisë dhe kontrollit.
Pyetjet lidhen me mënyrën e përzgjedhjes së arkitektëve dhe investitorëve, bazën ligjore të projekteve, procedurat administrative, ndryshimet në ligjin për zonat e mbrojtura, burimet e financimit, analizat e ndikimit ekonomik dhe mjedisor, si dhe verifikimet për konflikt interesi, pastrim parash dhe procedurat e dhënies së lejeve.
“Këto pyetje qe sot kërkojnë përgjigje dhe duhet japin llogari deri fund. Është koha për llogaridhënie dhe jo më për propagandë”, u shpreh Xhixho.
