Shkup, 27 korrik, Zhurnal.mk – -Sistemet e ujësjellësit nuk duhet të sigurohen as nga Ushtria, as nga Policia. Çdo institucion që është përgjegjës për këto sisteme në kuadër të komunave duhet t’i kryejë detyrat dhe kompetencat e përcaktuara me ligj, deklaroi sot ministri i Punëve të Brendshme, Pançe Toshkovski, përcjell TV21. Në konferencën për media në Qendrën për Menaxhim me Kriza në Shkup, Toshkovski prezantoi informacionet më të fundit për situatën me ujin nga ujësjellësi i Gostivarit, duke theksuar se uji mund të përdoret vetëm për qëllime teknike, por jo për pirje dhe as për përgatitjen e ushqimit.
Duke iu përgjigjur pyetjes së gazetarëve nëse mendon se duhet të rritet siguria e ujësjellësit me kontrolle më të shpeshta policore apo edhe me përfshirjen e Ushtrisë, siç propozoi opozita, Toshkovski tha se ushtria nuk duhet të angazhohet për sigurimin e sistemeve të ujësjellësit, veçanërisht në kushte paqeje.
“Personalisht, a mendoj se ushtria duhet t’i sigurojë sistemet e ujësjellësit? Jo, nuk mendoj. Kjo nuk është punë e Ministrisë së Mbrojtjes dhe as e Ushtrisë, të paktën jo në kushte paqeje. Çdo institucion që është përgjegjës për kujdesin ndaj sistemeve të ujësjellësit duhet të marrë të gjitha kompetencat ligjore të përcaktuara me rregullore”, tha Toshkovski.
Ai i bëri thirrje opozitës që, në vend se të “nxehë atmosferën” te qytetarët, të fokusohet në aktivitete në të mirë të tyre.
“Do t’i rekomandoja opozitës që, në vend se të krijojë histeri dhe të përpiqet të rrëzojë gjithçka që është e dukshme për qytetarët, të fokusohet në të mirën e qytetarëve”, tha Toshkovski.
Sa i përket pranisë policore në terren, ministri tha se policët janë të pranishëm, por sigurimi i rrjeteve të ujësjellësit nuk është kompetencë e tyre.
“Policia duhet të jetë në terren? Po, dhe është. Por a duhet policia të sigurojë rrjetet e ujësjellësit në gjithë shtetin? Jo. Kjo është përgjegjësi e institucioneve të tjera”, theksoi ai.
Toshkovski shtoi se për një kohë të gjatë nuk është investuar dhe nuk janë zgjidhur problemet e qytetarëve nga ata që kanë menaxhuar institucionet.
“Ky është fakt. Për këtë arsye jemi në situatën ku jemi sot. Por gjithmonë do të ketë sfida dhe duhet të gjejmë mënyrën më të përshtatshme për t’u përgjigjur në nivelin më profesional”, tha ministri.
Në lidhje me hetimin për rastin e ujit në Gostivar dhe nëse ai po zgjerohet ndaj personave të tjerë të dyshuar, Toshkovski tha se puna po vazhdon dhe se veprohet sipas udhëzimeve të Prokurorisë.
“Kur të ketë momente të reja që mund t’i bëjmë publike, do t’i informojmë qytetarët”, deklaroi Toshkovski.
