Shkup, 28 korrik, Zhurnal.mk – Në vitin 2022, Hristijan Mickoski deklaronte se rritja e çmimit të ngrohjes qendrore ishte plaçkitje ndaj qytetarëve, pasojë e hajnisë dhe se familjet do të paguanin deri në 120 euro më shumë në vit. Sot, kur Mickoski është kryeministër, për vetëm tetë muaj u ka sjellë qytetarëve të Shkupit dy shtrenjtimë të njëpasnjëshme – 5,9% në dhjetor 2025 dhe 5,96% në gusht 2026, pra një rritje kumulative prej rreth 12,2%, akuzon Levica.
„Sa ishte në opozitë, shtrenjtimi ishte grabitje. Pasi u ul në kolltukun e kryeministrit, grabitja mori emër të ri: ‘korigjim minimal’ dhe ‘çmimi më i ulët në rajon’. Sipas doktrinës energjetike të kryeministrit ‘energetist’, çmimi nuk varet nga kostot dhe standardi i jetesës, por nga kush e kontrollon Qeverinë. Kur faturat i rrit DPMNE, edhe këtë përpiqen ta paraqesin si sukses. Nga dhjetori, fatura mesatare u rrit për rreth 130 denarë. Nga gushti pason rritje e re prej rreth 140 denarësh për një banesë prej 60 m². Në vend që ta parandalonte goditjen e dytë ndaj buxheteve familjare, KRRE nën drejtimin e Aco Ristovit – mik biznesi dhe bashkëpartiak i Mickoskit – e shpall këtë si shtrenjtim minimal, sikur qytetarët duhet të jenë mirënjohës“, thuhet në reagimin e Levicës.
Sipas partisë, veçanërisht fyese është teza se Shkupi ka ngrohje më të lirë se Beogradi, Lubjana, Sofja apo Sarajeva.
„Punëtori maqedonas nuk merr pagë të Lubjanës, nuk ka buxhet familjar të Beogradit dhe nuk jeton me të ardhurat e Sofjes. Pagat e punëtorit maqedonas janë më të ulëtat në Evropë! Ai jeton në Maqedoni, ku ushqimi, banimi, rryma, uji dhe ngrohja çdo muaj marrin pjesë gjithnjë e më të madhe të pagës“, thekson Levica.
Partia shton se edhe më skandaloze është fakti që një numër i madh familjesh ende paguajnë energjinë termike sipas sipërfaqes së banesës, e jo sipas konsumit real.
Levica kërkon që Qeveria dhe KRRE të publikojnë të plotë llogaritjen e çmimit të ri – sa janë kostot reale, sa janë kostot e njohura sipas metodologjisë tarifore dhe sa është të ardhura e rregulluar; Qeveria të vendosë mekanizëm automatik për mbrojtjen e familjeve me të ardhura të ulëta; të shpjegojë pse mijëra familje ende paguajnë sipas sipërfaqes dhe jo sipas konsumit të matur; si dhe të publikojë plan të qartë me afate për futjen e matjes individuale ose shpërndarësve të nxehtësisë aty ku është teknikisht e mundur, që secili të paguajë sipas konsumit real – siç kërkon Komuniteti Energjetik.
