Shkup, 30 korrik, Zhurnal.mk – Lidhja Shqiptare, e udhëhequr nga Ziadin Sela, ka reaguar ashpër ndaj deklaratës së kryetarit të Kuvendit, Afrim Gashi, i cili u shpreh se “më mirë një ligj gjysmak për përfaqësim të drejtë dhe adekuat sesa të mos ketë ligj fare”, transmeton Zhurnal.mk.
“Lidhja Shqiptare” e cilëson këtë qëndrim si skandaloz, duke shtuar se edhe më shqetësues është fakti që, sipas saj, të njëjtin qëndrim e mbështesin edhe bashkëkryetarët e koalicionit VLEN.
Sipas partisë, është më e pranueshme që e drejta për përfaqësim të drejtë dhe adekuat të mbetet e garantuar vetëm me Kushtetutë, sesa të miratohet një ligj me përmbajtjen e propozuar nga Qeveria.
Në reagim thuhet se projektligji nuk parashikon sanksione për moszbatimin e tij, nuk përmban mekanizma të qartë për implementim dhe, sipas Lidhjes Shqiptare, synon heqjen e kuotave etnike gjatë punësimit.
“Lidhja Shqiptare” vlerëson se një zgjidhje e tillë do të cenonte të drejtat e shqiptarëve dhe do ta linte përfaqësimin e tyre në institucionet shtetërore në varësi të vullnetit politik të qeverive të ardhshme.
“Ju nuk keni të drejtë të tregtoni të drejtat e shqiptarëve”, thuhet në reagim.
Në fund, Lidhja Shqiptare i drejtohet kryetarit të Kuvendit, Afrim Gashi, me një mesazh politik, duke iu referuar alegorisë së bretkosës që ai kishte përdorur më herët.
