Shkup, 7 gusht, Zhurnal.mk – Ekonomia e Maqedonisë shënon zhvillim pozitiv si rezultat i politikave të orientuara drejt menaxhimit të përgjegjshëm, shpenzimeve racionale dhe mbrojtjes së interesave të qytetarëve. Menaxhimi shtëpiak me financat publike po jep rezultate dhe krijon bazë për një ambient ekonomik stabil dhe të parashikueshëm, thonë nga VMRO‑DPMNE.
Të dhënat më të reja zyrtare tregojnë se borxhi publik në tremujorin e dytë të vitit 2026 arrin në 58,8 për qind të BPV‑së, që paraqet ulje prej 0,1 pikë përqindje krahasuar me tremujorin paraprak. Në vlerë absolute, borxhi publik është ulur për 21 milionë euro dhe arrin në 10.726 milionë euro.
Trendi pozitiv është edhe më i theksuar nëse bëhet krahasim me periudhat e mëparshme. Krahasuar me fundin e vitit 2024, borxhi publik është ulur për 2,6 pikë përqindje, ndërsa krahasuar me fundin e vitit 2025 ulja është 0,6 për qind.
Këta tregues janë dëshmi se me qasje të përgjegjshme dhe menaxhim të kujdesshëm të resurseve, shteti arrin të ruajë stabilitetin financiar dhe të krijojë kushte për zhvillim ekonomik.
Në një periudhë kur po shlyhen obligime të rëndësishme të trashëguara nga e kaluara, Qeveria e udhëhequr nga VMRO‑DPMNE arrin të sigurojë përmbushje të rregullt të detyrimeve financiare, stabilitet të buxhetit dhe njëkohësisht realizim të projekteve që kanë rëndësi të drejtpërdrejtë për qytetarët.
Ulja e borxhit publik nuk është vetëm tregues statistikor, por dëshmi për një qasje të ndryshme në menaxhimin e mjeteve shtetërore, të cilat duhet të orientohen drejt investimeve, zhvillimit, infrastrukturës më të mirë, shëndetësisë, arsimit dhe hapjes së mundësive të reja ekonomike.
VMRO‑DPMNE vazhdon me politika të menaxhimit të përgjegjshëm, disiplinë fiskale dhe krijimin e një ekonomie stabile që do të sigurojë kushte më të mira për qytetarët dhe gjeneratat e ardhshme, shtojnë nga partia.
