Shkup, 8 gusht, Zhurnal.mk – VLEN ka reaguar ndaj deklaratave të nënkryetarit të BDI-së, Bujar Osmani, lidhur me vendimin e Qeverisë së Shqipërisë për shpalljen “non-grata” të imamit Bekir Halimi dhe aktivistit Valon Bela.
VLEN thekson se Osmani po përpiqet të krijojë përshtypjen se po del në mbrojtje të Halimit dhe Belës, duke kërkuar rishikimin e vendimit të autoriteteve shqiptare.
“Hipokrizia e Bujarit i ngjan thënies popullore: ‘Natën të vret, ditën të qan’”, thuhet në reagimin e VLEN-it.
Sipas VLEN-it, Osmani dhe BDI-ja kanë pasur ndikim në vendimmarrjen e Tiranës dhe pretendohet se vendimi ndaj Halimit dhe Belës nuk do të ishte marrë pa ndikimin e tyre. VLEN, megjithatë, nuk paraqet prova konkrete për këto pretendime.
“Bujari dhe BDI-ja janë ata që ndikojnë drejtpërdrejtë te Qeveria e Tiranës për t’i shpallur armiqtë në mesin e shqiptarëve të Maqedonisë së Veriut”, thuhet në komunikatë.
VLEN gjithashtu akuzon eksponentë të BDI-së se në të kaluarën kanë mbështetur idenë e përfshirjes së shqiptarëve nga Maqedonia e Veriut në “listën e zezë” të Shqipërisë.
Në reagim përmendet edhe rasti “Monstra”, për të cilin VLEN ngre pretendime lidhur me qëndrimet e mëparshme publike të Osmanit dhe rolin e tij politik gjatë periudhës kur BDI ishte pjesë e pushtetit.
“Bujari, me urdhër të Jankullovskës, në disa media thoshte se Haki Aziri ishte zhdukur me vetëdëshirë, ndërsa në disa të tjera kërkonte hetim ndërkombëtar për rastet e montuara nga qeveritë ku edhe ai ishte ministër”, pretendon VLEN.
Në fund të reagimit, VLEN e lidh qëndrimin e Osmanit me rezultatin e zgjedhjeve në Çair, duke e cilësuar si shenjë të, siç thotë, “fundit të tij politik”.
“Klithmat e Bujarit në Facebook janë pasojë e pamundësisë për ta pranuar fundin e tij politik, pas humbjes së thellë në Çair”, thuhet në komunikatë.
VLEN e përmbyll reagimin me kritika ndaj BDI-së, duke pretenduar se me politikanë që mbajnë qëndrime të ndryshme në raste të ndryshme, kjo parti nuk ka perspektivë politike dhe do të qëndrojë gjatë në opozitë.
