Maqedonia është ngjitur në vendin e 30‑të në botë sipas Indeksit Kombëtar për siguri kibernetike, të përgatitur nga Akademia Estoneze për e‑qeverisje, njoftoi sot deputetja dhe anëtare e Komitetit Ekzekutiv të VMRO‑DPMNE, Dragana Bojkovska.
Sipas matjeve të parashikuara, vendi ka realizuar ngritje prej 29 pozicionesh krahasuar me renditjen e mëparshme.
„Sipas Indeksit Kombëtar për siguri kibernetike, të përgatitur nga Akademia Estoneze për e‑qeverisje, Maqedonia u ngjit nga vendi i 59‑të në të 30‑tën në botë, mes 155 shteteve dhe territoreve të renditura, me 84,17 pikë nga 100 të mundshme. Ky është një ngritje prej 29 pozicionesh. Në vitin 2023, Maqedonia ishte në vendin e 59‑të, pa kornizë ligjore gjithëpërfshirëse për siguri kibernetike, pa përgjegjësi të qartë institucionale dhe pa qasje strategjike për mbrojtjen e infrastrukturës kritike,“ deklaroi Bojkovska.
Ajo shtoi se periudha e mëparshme në këtë sektor karakterizohej nga mungesa e masave sistematike dhe vizionit.
„Vitet e politikës negative të pushtetit të kaluar lanë një shtet të cenueshëm, të paunifikuar dhe pa vizion në këtë fushë, e cila sot është ndër më të rëndësishmet për çdo shtet modern dhe të përgjegjshëm,“ theksoi deputetja.
Bojkovska i përmendi ndryshimet ligjore dhe dokumentet strategjike si kyçe për përparimin e arritur.
„Është miratuar Ligji i ri për sigurinë e sistemeve rrjetore dhe informative, është miratuar Strategjia për siguri kibernetike 2025–2028 me Plan Veprimi konkret. Vendosëm mekanizma për koordinim kombëtar dhe forcuam ndjeshëm kapacitetet për raportim dhe menaxhim të incidenteve kibernetike. Ky është përparim për vendin i bazuar mbi partneritete, vizion të qartë dhe seriozitet në zbatimin e reformave,“ potencoi Bojkovska.
Ajo nënvizoi se mbrojtja e hapësirës digjitale dhe infrastrukturës kritike mbeten ndër prioritetet kryesore.
„Vazhdojmë me zbatimin e reformave, me ndërtimin e kapaciteteve për parandalim dhe reagim, si dhe me thellimin e bashkëpunimit ndërkombëtar. Shtet digjital i sigurt do të thotë shërbime publike të sigurta, të dhëna të mbrojtura të qytetarëve dhe infrastrukturë kritike rezistente, e kjo është detyrë që Qeveria e udhëhequr nga VMRO‑DPMNE e merr seriozisht,“ përfundoi Bojkovska.
