Tiranë, 21 gusht, Zhurnal.mk – Shqipëria ka përmbushur përpara afatit objektivin për mbi 600 MW kapacitete të reja të energjisë së rinovueshme, ndërsa reformat në sektorin energjetik po vijojnë të japin rezultate konkrete.
Ministri i Infrastrukturës dhe Energjisë, Enea Karakaçi, në një videomesazh të publikuar në rrjetet sociale, theksoi se rezultatet janë arritur përmes një sërë reformash që synojnë modernizimin dhe qëndrueshmërinë e sektorit.
“Reformat në sektorin e energjisë po japin rezultate konkrete”, u shpreh Karakaçi, duke renditur ndër prioritetet modernizimin e kuadrit ligjor, përafrimin me standardet e Bashkimit Evropian, zhvillimin e energjisë së rinovueshme, uljen e varfërisë energjetike dhe krijimin e komuniteteve të energjisë.
“Gjatë këtij viti kemi përmbushur një sërë masash kyçe, duke modernizuar kuadrin ligjor dhe duke e afruar Shqipërinë me standardet e Bashkimit Evropian. Kemi ngritur sistemin e garancive të origjinës për energjinë e rinovueshme, i cili u ofron konsumatorëve më shumë transparencë mbi burimin e energjisë që përdor”, u shpreh ai.
“Gjithashtu, kemi miratuar rregulla të reja për etiketimin e produkteve me ndikim në konsumin e energjisë, duke i ndihmuar qytetarët të bëjnë zgjedhje më të informuara dhe më efiçente, në përputhje me të gjitha standardet e Bashkimit Evropian. Një nga hapat më të rëndësishëm ishte miratimi i Ligjit të ri për Sektorin e Energjisë Elektrike. Ky ligj forcon funksionimin e tregut të energjisë, rrit sigurinë e furnizimit dhe e afron vendin tonë me tregun evropian të energjisë. Po ashtu, kemi harmonizuar legjislacionin për biokarburantet, kemi thjeshtuar procedurat për investimet në energjinë e rinovueshme dhe kemi avancuar zbatimin e paketës së integrimit të tregut të energjisë me Bashkimin Evropian”, tha ministri.
Karakaçi vuri në dukje se, një tjetër arritje e rëndësishme është miratimi i Planit Kombëtar për adresimin e varfërisë energjetike, si dhe i kuadrit ligjor për komunitetet e energjisë, një masë e shumëpritur nga të gjithë vetëprodhuesit e energjisë. “Këto masa krijojnë më shumë mundësi për qytetarët, bizneset dhe pushtetin vendor që të jenë pjesë aktive e tranzicionit energjetik”, tha ai.
Sipas tij, një nga rezultatet kryesore është arritja para afatit e objektivit për mbi 600 MW kapacitete të reja të energjisë së rinovueshme, duke forcuar bazën për një sektor energjetik më të diversifikuar dhe të qëndrueshëm.
“Këto rezultate i hapin rrugën edhe disbursimit të 61 milionë eurove në kuadër të Growth Plan dhe Reform Agenda”, deklaroi ministri, duke shtuar se fondet do të mbështesin investimet, zhvillimin ekonomik dhe procesin e integrimit evropian.
Karakaçi nënvizoi se puna do të vijojë me të njëjtin angazhim për forcimin e sektorit energjetik dhe përafrimin e mëtejshëm të Shqipërisë me Bashkimin Evropian.
“Puna jonë vijon me të njëjtin angazhim për një sektor energjetik më të fortë dhe një Shqipëri më pranë Bashkimit Evropian”, u shpreh ai.
