Uashington, 22 shtator, argument.mk/ – Presidenti francez Emmanuel Macron deklaroi sot se Franca dhe SHBA-ja kanë rënë dakord të bashkëpunojnë për të ulur tensionet në Ngushticën e Hormuzit dhe për të mbrojtur infrastrukturën civile në Ukrainë.
Pas takimit me presidentin amerikan, Donald Trump, Macron shkroi në rrjetin X se të dy vendet do të ndërmarrin hapa të përbashkët për të ulur tensionet në tregjet e energjisë, si dhe për të mbrojtur infrastrukturën e rëndësishme në Lindjen e Mesme dhe lirinë e lundrimit në Ngushticën e Hormuzit.
Përsa i përket Ukrainës, Macron tha se Franca dhe SHBA-ja do të bashkojnë përpjekjet për të arritur një marrëveshje, për ndalimin e përkohshëm të sulmeve ndaj objekteve energjetike dhe infrastrukturës civile.
Ai theksoi se popullsia civile, duhet të mbrohet dhe se duhet të nisin sa më shpejt negociatat serioze për kushtet e një paqeje mes Rusisë dhe Ukrainës.
Macron nuk dha detaje se çfarë masash konkrete kanë rënë dakord të marrin Franca dhe SHBA-ja për Lindjen e Mesme apo Ukrainën.
Trump dhe Macron pritet të mbajnë fjalimet e tyre sot në Asamblenë e Përgjithshme të OKB-së, ku pritet të marrin pjesë rreth 120 liderë botërorë.
