Shkup, 8 tetor, argument.mk/ – Ballkani Perëndimor tashmë ka një kornizë të përbashkët rajonale për avancimin e mbrojtjes së biodiversitetit dhe restaurimin e ekosistemeve të degraduara deri në vitin 2030.
Kjo është bërë e mundur përmes miratimit të dy dokumenteve kryesore rajonale: Planit Strategjik për Biodiversitetin e Ballkanit Perëndimor 2030 (Western Balkans Six Biodiversity Strategy Plan 2030) dhe Planit për Restaurimin e Peizazheve Pyjore të Ballkanit Perëndimor (Western Balkans Six Forest Landscape Restoration Plan).
Sipas njoftimit të Unionit Ndërkombëtar për Ruajtjen e Natyrës (IUCN), miratimi i këtyre dy dokumenteve përbën një hap të rëndësishëm drejt forcimit të bashkëpunimit rajonal në mbrojtjen e natyrës dhe rikthimin e ekosistemeve të dëmtuara.
Planet synojnë të krijojnë një qasje të koordinuar mes vendeve të Ballkanit Perëndimor për ruajtjen e biodiversitetit, menaxhimin e qëndrueshëm të burimeve natyrore dhe restaurimin e peizazheve pyjore.
Dokumentet e miratuara paraqesin gjithashtu një instrument të rëndësishëm për zbatimin e Agjendës së Gjelbër për Ballkanin Perëndimor, si dhe për përafrimin e rajonit me objektivat evropiane dhe globale në fushën e mbrojtjes së natyrës dhe biodiversitetit.
Sipas IUCN-së, kjo kornizë e përbashkët rajonale pritet të ndihmojë vendet e Ballkanit Perëndimor në përmbushjen e objektivave të tyre për mbrojtjen dhe restaurimin e natyrës deri në vitin 2030, duke forcuar njëkohësisht bashkëpunimin dhe koordinimin ndërmjet vendeve të rajonit.
