Shkup, 27 tetor, argument.mk/ – Çmimi mesatar i blerjes së duhanit nga prodhimi i sivjetshëm pritet të tejkalojë 420 denarë për kilogram, njoftoi ministri i Bujqësisë, Pylltarisë dhe Ekonomisë së Ujërave, Borçe Serafimovski, në fjalimin e tij në Forumin për Duhanin Oriental të Shoqatës Ndërkombëtare të Prodhuesve të Duhanit (ITGA), që u mbajt në Prilep.
“Ministria po koordinon përgatitjet për grumbullimin e duhanit, me qëllim që të sigurohen kushte të sakta kontraktuale, vlerësim transparent dhe përmbushje në kohë e obligimeve nga ana e grumbulluesve. Ju siguroj se shërbimet kompetente do t’i zbatojnë me përpikëri autorizimet ligjore dhe do të veprojnë në mënyrë efikase për mbrojtjen e të drejtave të prodhuesve”, theksoi ministri Serafimovski.
Ai njoftoi se, si shtesë e të ardhurave nga shitja, duhanprodhuesit mund të presin subvencione prej 80 denarë për kilogram për klasën e parë, 70 denarë për klasën e dytë dhe 60 denarë për klasën e tretë, duke veçuar qëndrueshmërinë ekonomike të ekonomive bujqësore dhe vlerësimin e cilësisë si prioritete në zbatimin e Strategjisë për Prodhimin e Duhanit për periudhën 2021–2027.
“Temperaturat e larta dhe thatësira ndikojnë në rendimentin dhe vetitë e fletës së duhanit, veçanërisht kur këta faktorë klimatikë veprojnë njëkohësisht. Prandaj, përshtatjen ndaj këtyre ndryshimeve do ta integrojmë në planifikimin e prodhimit, me rekomandime të bazuara në njohuri shkencore dhe matje lokale”, tha ministri Serafimovski, duke theksuar bashkëpunimin me Institutin Shkencor të Duhanit në Prilep dhe Fakultetin e Shkencave Bujqësore dhe Ushqimit në Shkup për hartimin e politikave zhvillimore si përgjigje ndaj sfidave që rrjedhin nga ndryshimet klimatike.
Duke folur për rëndësinë ekonomike të sektorit, ai theksoi se prodhimi i duhanit angazhon rreth 18.000 ekonomi bujqësore, ndërsa eksporti i duhanit dhe produkteve të përpunuara të duhanit gjeneron një hyrje vjetore valutore prej rreth 140 deri në 150 milionë euro, duke shtuar se politikat zhvillimore zbatohen me respekt të plotë ndaj politikave të shëndetit publik dhe obligimeve ndërkombëtare të shtetit.
“Masat mbështetëse do t’i harmonizojmë me lëvizjet e tregut, ndërsa duhanprodhuesve do t’u sigurojmë me kohë informacione për kërkesën dhe kushtet e grumbullimit, në mënyrë që më lehtë të planifikojnë sipërfaqet që do të mbjellin dhe investimet e nevojshme”, porositi ministri Serafimovski.
Forumi për Duhanin Oriental në Prilep u organizua nga ITGA dhe Shoqata “Maka e duhanmbledhësve”, ndërsa në të morën pjesë duhanprodhues, përfaqësues të Unionit Ndërkombëtar të Prodhuesve të Duhanit (UNITAB), përfaqësues të komunitetit shkencor dhe grumbullues të duhanit.
