Tiranë, 11 nëntor, argument.mk/ – Fuqizimi i institucionit të Avokatit të Popullit, mbrojtja e të drejtave të njeriut dhe roli i institucioneve të pavarura në procesin e integrimit evropian ishin në fokus të takimit mes Avokatit të Popullit, Endrit Shabani, dhe ambasadores së Bashkimit Evropian në Shqipëri, Sofia Moreira de Sousa.
Gjatë takimit, ambasadorja prezantoi gjetjet e Raportit të Zgjerimit të Komisionit Evropian për Shqipërinë për vitin 2026, ku nënvizohet nevoja për mbështetjen dhe forcimin e këtij institucioni.
Shabani bëri të ditur se institucioni po përballet me rritje të ngarkesës së punës, pasi numri i ankesave të qytetarëve është shtuar me rreth një të tretën krahasuar me një vit më parë. Paralelisht, roli i Avokatit të Popullit po zgjerohet në kuadër të procesit të integrimit evropian dhe përafrimit të legjislacionit shqiptar me acquis communautaire.
Ambasadorja Moreira de Sousa theksoi se raporti evidenton mungesën e burimeve njerëzore dhe financiare në zyrat rajonale të Avokatit të Popullit, duke kërkuar që këto problematika të adresohen nga Kuvendi.
Shabani propozoi që zbatimi i rekomandimeve të institucioneve të pavarura të përfshihet si pikë e përhershme në dialogun mes Bashkimit Evropian dhe qeverisë shqiptare për Kapitullin 23.
Në takim u diskutua edhe për mbrojtjen e të drejtave të fëmijëve, zbatimi i të cilave vlerësohet si sfidues në raportin e Komisionit Evropian, si dhe për perspektivën e të rinjve në një Shqipëri evropiane, ndërtimin e institucioneve demokratike dhe përgjegjësitë që shoqërojnë anëtarësimin në BE.
Ambasadorja e Bashkimit Evropian e cilësoi Avokatin e Popullit një partner të rëndësishëm në mbikëqyrjen institucionale dhe forcimin e llogaridhënies demokratike, duke rikonfirmuar mbështetjen e BE-së për rritjen e rolit të këtij institucioni në procesin e integrimit.
