Shkup, 18 prill, argument.mk/ – Pagesa në pikat e autostradave në Maqedoni mund të marrë një mënyrë të re funksionimi, pa ndalimin e automjeteve në stacionet e pagesës. Qeveria po shqyrton vendosjen e një sistemi elektronik me të cilin qytetarët do të paguanin sipas numrit të kilometrave të përshkuar.
Zëvendëskryeministri dhe ministri i Transportit, Aleksandar Nikolloski, paralajmëroi se do të përgatitet një zgjidhje ligjore për modelin e ri, ndërsa do të kërkohet edhe ndihma e ekspertëve nga Komuniteti Evropian i Transportit.
Sipas Nikolloskit, ky sistem do të mundësonte qarkullim më të shpejtë të trafikut, siguri më të madhe dhe pagesë më të drejtë, pasi shoferët do të paguanin vetëm për segmentin që realisht e kanë përdorur.
“Ideja jonë është të paguhet sipas kilometrit, gjë që do të jetë shumë më e drejtë se ajo që ndodh tani. Teorikisht, nëse niseni nga Demir Kapia dhe shkoni në Gjevgjeli, paguani 100 denarë në pikën e pagesës te Smokvica, ndërsa nëse niseni nga Shkupi drejt Gjevgjelisë, në të njëjtën pikë paguani sërish 100 denarë. Për banorët e Demir Kapisë kjo është e pandershme dhe e padrejtë. Prandaj mendojmë se duhet të paguhet sipas kilometrave të përshkuar, gjë që do ta ulë ndjeshëm koston”, deklaroi Nikolloski.
Ai informoi se në përgatitjen e zgjidhjes ligjore do të përfshihen ekspertë nga Komuniteti Evropian i Transportit, me qëllim që të shfrytëzohen përvojat e shteteve më të avancuara evropiane. Si shembuj nga rajoni ai përmendi Kroacinë, ku po përgatitet zbatimi i një sistemi të tillë, dhe Beogradin, ku ka filluar zbatimi i tij në unazën e qytetit.
Nikolloski pret që ligji të prezantohet gjatë muajit dhjetor.
Fillimisht, mënyra e re e pagesës do të zbatohej në autostradën Kërçovë-Ohër, për të cilën ministri pret që të vihet plotësisht në përdorim në muajin maj. Në javët e ardhshme, sipas paralajmërimeve, pritet të lëshohet në përdorim edhe pjesa më e vështirë e traseut, me katër galeri, ura, viadukte dhe tunelet më të gjata.
Plani është që sistemi gradualisht të zgjerohet edhe në segmentet e tjera autostradore që janë në ndërtim, ndër të cilat Prilep-Manastir, Bukojçan-Gostivar, Gostivar-Tetovë dhe Kërçovë-Bukojçan.

