Shkup, 5 shkurt – Kryetari i Sindikatës së Pavarur të Ushtarëve Profesional, Zoran Pavllovski, akuzon ish-kryetarin e kësaj sindikate, Aleksandar Naskovskin, se ai nuk ka punuar dhe nuk ka luftuar për interesat e ushtarëve, por vetëm për interesat e tij personale. Këtë gjë Pavllovski e arsyetoi me disa dokumente, ku pretendon se Naskovski pas shkarkimit të tij në krye të kësaj sindikate më 5 maj të vitit të kaluar, ka vazhduar të keqpërdorë xhirollogarinë e sindikatës dhe mjetet e anëtarësisë së ushtarëve, andaj ai tani do të ballafaqohet me kallëzim penal, thotë Pavllovski.
“Aleksandar Naskovski publikisht të tregojë dhe t’u sqarojë anëtarëve se çfarë ka bërë me anëtarësimin e tyre prej 100 deri në 300 denarë, respektivisht me 120 mijë denarë në muaj dhe ku janë shpenzuar këto para. Unë si kryetar i SPUP-Shkup do të ngre kallëzim penal në MESO për t’i kthyer të gjitha paratë që ai dhe shokët e tij i kanë tërhequr nga xhirollogaria e sindikatës.”, – deklaroi kryetari i Sindikatës së Pavarur të Ushtarëve Profesional, Zoran Pavllovski.
Në dokumentet e publikuara para mediave, Pavllovski pretendon se Naskovski pas shkarkimit të tij, joligjërisht ka hapur një strukturë të re sindikale me të njëjtin emër, por me shtojcën MES në vend MESO, siç është edhe emri i plotë i Sindikatës së Ushtarëve, duke paraqitur edhe ndryshimin në xhirollogarinë e Sindikatës së Pavarur të Ushtarëve Profesional SO-Shkup, në kuadër të MESO-s. Naskovski sot nuk ishte i kapshëm për mediat për t’i sqaruar këto akuza.
