Ministri i Jashtëm rus Sergei Lavrov do të udhëtojë në Maltë për një takim të Organizatës për Siguri dhe Bashkëpunim në Evropë (OSBE) në fillim të dhjetorit.
Nëse konfirmohet, kjo do të jetë hera e parë që Lavrov viziton një vend të BE-së që nga pushtimi i plotë i Ukrainës nga Rusia në fillim të vitit 2022.
Bëhet e ditur se hera e fundit që Lavrov vizitoi ndonjë vend të BE-së ishte në dhjetor të vitit 2021 – dy muaj para luftës gjithëpërfshirëse të Rusisë kundër fqinjit të saj perëndimor – gjithashtu për një takim të këshillit ministror të OSBE-së në Stokholm.
Në dhjetor të vitit 2022, pothuajse një vit pas luftës së Rusisë, OSBE u mblodh në Lodz të Polonisë.
Por, Varshava refuzoi hyrjen e Lavrovit në vend, shkruan euronews, përcjell Telegrafi.
Vitin e kaluar, takimi u zhvillua jashtë BE-së, në vendin e Ballkanit Perëndimor, Maqedoninë e Veriut – ku Lavrov mori pjesë personalisht në seancë.
Siç raportohet, udhëtimi i vitit 2023 shkaktoi kritika të zëshme nga Kievi mes përjashtimeve të minutës së fundit nga sanksionet ekzistuese kundër Kremlinit.
Bullgaria, një anëtare e BE-së, i dha leje një aeroplani që mbante Lavrov të fluturonte nëpër hapësirën ajrore të vendit në rrugën drejt kryeqytetit maqedonas, Shkup.
Leja ishte e përkohshme dhe e vlefshme vetëm për tre orë para dhe 72 orë pas datës dhe orës së planifikuar të fluturimit.
Maqedonia e Veriut, një vend kandidat për në BE, gjithashtu lëshoi një leje të ngjashme.
Ndryshe, Ukraina, Letonia, Estonia dhe Lituania e bojkotuan takimin.
Pothuajse të gjitha vendet evropiane kanë mbyllur hapësirën e tyre ajrore për aeroplanët rusë për shkak të sanksioneve të BE-së kundër Rusisë.
Për më tepër, BE vendosi sanksione kundër Lavrov, liderit të Kremlinit Vladimir Putin dhe të tjerëve të përfshirë në luftën e agresionit të Moskës në shkurt 2022.
Nëse konfirmohet nga Malta, udhëtimi i Lavrov në takimin e këtij viti do të ngrejë pyetje serioze në Komisionin Evropian dhe Këshillin e Bashkimit Evropian.
Të gjitha vendet anëtare të BE-së janë anëtarë pjesëmarrës të OSBE-së, një organizatë rajonale e orientuar drejt sigurisë që përfshin 57 vende në Evropë, Amerikën e Veriut dhe Azi.
