Strugë, 22 nëntor – Me aktivitete të ndryshme, qytetarët e Strugës shënojnë festat e nëntorit, përkatësisht 22 Nëntorin – Ditën e Alfabetit dhe 28 Nëntorin – Ditën e Flamurit dhe Pavarësisë së Shqipërisë.
“22 Nëntori është festë që festohet çdoherë. Brenga ime është se energjia për ta festuar nëntorin mund të them se ka një rënie, por me kolegë, festat e nëntorit duhet t’i mbështesim, që te brezat të lëmë një pasuri.”, – deklaroi aktivisti i manifestimeve kulturore kombëtare, Verdat Kolonja.
Ndërkohë gjuhëtarët mendojnë se duhet të ketë hapa konkretë për ruajtjen dhe pasurimin e gjuhës shqipe.
“Për të ruajtur pasurinë, gjuhën shqipe, duhet të ketë orvatje, duhet të kemi kujdes dhe të kujdesemi për të. Shqiptarët e kanë për obligim të përdorin gjuhën e pastër shqipe.”, – theksoi profesori i gjuhës shqipe dhe letërsisë, Resul Bekteshi.
Gjuhëtarët po ashtu këshillojnë që të merren masa për ruajtjen dhe kultivimin e gjuhës shqipe, duke u përshtatur me epokën e digjitalizimit.
