Njohësi i zhvillimeve politike, Melazim Koci tha se takimi i sotëm në Bruksel i kryeministrit, Albin Kurti me përfaqësuesen e re të BE-së për Politikë të Jashtme dhe Siguri, Kaja Kallas, ishte më shumë takim kortezie. Megjithatë, ai e vlerësoi faktin se Kallas kërkoi që të adresohet çështja e Banjskës dhe që sulmin në Ibër Lepenc e cilësoi si akt terrorist.
Sipas tij është e rëndësishme që Kallas e cila vjen nga Estonia dhe e njeh natyrën e politikes ruse, e riafirmoi qëndrimin e Bashkimit Evropian që mbetet te “Marrëveshja Franko Gjermane” si rruga e vetme për avancimin e Kosovës dhe Serbisë drejt BE-së dhe tejkalimit të problemeve në raportet e ndrersjella .
Sipas tij, toni i Kallas ishte më i lartë si në kuptimin e dënimit të Serbisë.
”Kërkoi që të adresohet çështja e Banjskës, sulmin në Ibër Lepenc e cilësoi si akt terrorist dhe kërkoi llogaridhënie. Është ton tjetër, ka një dozë më të lartë të dënimit të veprimeve të Serbisë dhe kjo është pritur nga Kaja Kallas”, tha ai.
Koci tha se nëse çdo gjë do të varet nga Kallas do të ketë presion më të madh ndaj Serbisë, por sipas tij ajo është e hendikepuar sepse kohëve të fundit janë shtuar forcat e ekstremit të djathtë të cilat radhiten pas Rusisë.
Ai tha se kjo rrethanë mund të ia vështirësoi punën, por sipas tij, Kallas është një hap më përpara Borellit, Lajçakut dhe “garniturës së mëparshme” të Bashkimit Evropian.
“Vetëm sot ajo tha më shumë se Borrell për dy tre vite”, shtoi ai .
Ai tutje tha se është evidente që ardhja e dy përfaqësuesve të lartë nga Estonia si në Kosovë, si në Bruksel ka shkaktuar nervozë në Beograd.
Koci: Dialogu me Serbinë ka përfuduar
Kërkesat e kryeministrit Kurti janë të qëlluara por sipas Melazim Kocit ky dialog nuk mund të vazhdojë, dhe siç thotë ai “ky dialog ka përfunduar pavarësisht asaj që shefja e diplomacisë evropiane Kaja Kallas thotë atë që duhet ta thotë”.
Ai shtoi se sulmi i fundit në Ibër Lepenc dëshmon qartë që Serbia ka hequr dorë nga zgjidhja apolitike për Kosovën, “nuk duan zgjidhje politike”.
“Mendoj që duhet një qasje krejt tjetër për dialog dhe ka ardhur koha që Kosova të thotë që ky dialog ka dështuar, por Kosova nuk heq dorë nga dialogu me bashkësinë ndërkombëtare për |”Marrëveshjen Franko- Gjermane”, pra për të mos marrë fajin e procesit”, tha ai.
Sipas tij në “Marrëveshjen Franko-Gjermane” ka elemente të cilat janë në favorin e Kosovës.
Ai shtoi se propozimi i presidentes Osmani ka shumë kuptim dhe se faktikisht nënkupton fundin e dialogut me Serbinë.
“Domethënë përfundon dialogu me Serbinë e vazhdon me Bashkësinë Ndërkombëtare mbi atë dokument, unë mendoj se kjo është rruga përpara e Kosovës deri sa të shohim një pozicionim të ri të administratës amerikane, deri atëherë duhet pritur, por deri atëherë Kosova duhet ta mbajë qëndrimin që i përmbahet Marrëveshjes Franko-Gjermane, do ta dialogoj atë temë me Bashkësinë Ndërkombëtare por jo me Serbinë”, tha Koci.
