Shkup, 10 dhjetor – Hoxha i Kumanovës, Rexhail Aziri, në një shkrim të tij , ka lëshuar akuza të rënda ndaj kreut të BFI-së Shaqir Fetahu-t, duke i bërë apel që të largohet përpara se situata të përkeqësohet, përcjell Zhurnal.mk
Zhurnal, ua sjell shkrimin e plotë në vijim:
“Këshillë me plot sinqeritet…
Largohu, Shaqir Fetau, përpara se situata të përkeqësohet aq shumë, saqë të rikujtojë fatin e udhëheqësve autokratë, diktatorë dhe sharllatan që kanë abuzuar me pushtetin e tyre. Kam këshilluar udhëheqës të BFI të RMV-së edhe më parë, por këtë herë po të drejtohem ty, me shpresën se ende mund të shmangësh një rrugë pa kthim dhe pasoja të rënda për institucionin që përfaqëson, i cili për besimtarët e këtij nënqielli është i shenjtë. Keqmenaxhimi i vazhdueshëm dhe përdhosja e çdo vlere nuk mund të justifikohen, as nuk mund të mbulojnë mungesën e cilësive që besimtarët presin nga një drejtues i denjë. Pa pikë turpi e pa asnjë ndjenjë ndërgjegjeje, në zgjedhjet e fundit ju arritët të shndërroni organet dhe institucionet e BFI-së (myftinitë) në shtabe zgjedhore, duke krijuar një makineri propagandistike që u shndërrua në luftë të egër, madje edhe kundër personaliteteve me integritet të lartë – një profesor-doktor, mjek i dëshmuar, lider partie. Për më tepër, ju ende vazhdoni me të njëjtin avaz, pa ndier asnjë fije turpi.
Mos harro se një ditë, kur zemërimi i besimtarëve dhe i shoqërisë të shpërthejë nga pakënaqësitë e akumuluara, ata që sot i ke përkrahës të nënshtruar, të cilët me zell kanë zbatuar urdhrat dhe dëshirat e tua të shfrenuara në organet e BFI-së, përfshirë edhe ato edukativo-arsimore, do të kthehen kundër teje. Atëherë, as falja e momentit, as simpatia e disa rretheve, nuk do të jenë mburojë.
Kjo këshillë nuk është një paralajmërim i thatë, por një ftesë e sinqertë për reflektim dhe përmirësim, sa ende ka kohë. Nëse nuk largohesh tani, do të vijë dita kur asnjë përpjekje nuk do të jetë e mjaftueshme për të ndrequr pasojat. Trego mençuri, lër vend për një njeri të denjë, që sjell dritë e drejtësi, dhe kështu ndoshta do të shpëtosh veten dhe institucionin nga një rrokullisje e pashmangshme.”, ka shkruar Aziri
