Tetovë, 20 janar – Mësimi në të gjitha shkollat komunale në Tetovë ka filluar dhe zhvillohet pa probleme. Në komunën e Tetovës funksionojnë 12 shkolla fillore dhe pesë shkolla të mesme komunale, informoi sot udhëheqësi i Sektorit për Veprimtari Publike pranë Komunës Tetovë, Nazmi Dauti në takim me gazetarët.
“Komuna e Tetovës ishte vazhdimisht në komunikim me udhëheqësit e shkollave. I kemi ndërmarrë të gjitha hapat që të mund të fillojmë në gjysmë vjetorin e dytë pa kurrfarë probleme. Deri më tani nuk kemi raportuar për kurrfarë problemi nga asnjë shkollë, mësimi do të vazhdojë pa kurrfarë problemesh. Sot ishim në komunikim me drejtorët dhe nuk është raportuar diçka që numër i madh i nxënësve mungojnë nga mësimi”, theksoi Dauti.
Në pyetjen e gazetarëve nëse vazhdon trendi i çregjistrimit të nxënësve, Dauti konfirmoi, por vlerëson se numri është më i vogël në krahasim me vitin e kaluar mësimor.
“Është evidente se që nga fillimi i vitit shkollor, sipas të dhënave që kemi mbledhur, 57 nxënës kanë marrë leje nga shkollat fillore për të shkuar në Perëndim dhe 17 nxënës nga shkollat e mesme. Ky është fatkeqësisht një problem që të rinjtë tanë po shkojnë jashtë vendit, por ne duhet të punojmë vazhdimisht që të rinjtë të qëndrojnë këtu. Ka njerëz si nga qyteti ashtu edhe nga fshati. Në shkollën fillore ‘Istigbal’ janë 17 nxënës, në SHF ‘Naim Frashëri’ 18 nxënës. Kemi edhe nga fshatrat malore. Kemi tetë nga shkolla fillore ‘Rilindja’, katër nga SH.F. ‘Gjergj Kastrioti-Skenderbeu’. Vitin e kaluar kemi pasur më shumë se sivjet, por numri ka qenë deri në 100, por këtë vit është 74 në shkollat fillore dhe të mesme. Qeveria duhet të mendojë diçka për të mbajtur rininë këtu, sepse nëse vazhdon ky trend do ta jetë shumë i vështirë funksionimi i shkollave tona, madje edhe i shoqërisë”, theksoi Dauti.
