Në Komisionin për Çështjet Ligjore, Administratën Publike dhe të Drejtat e Njeriut, u diskutua sot projektligji për disa ndryshime “Për letërnjoftimin elektronik të shtetasve shqiptarë”.
Deputetja e Partisë Demokratike Dhurata Çupi u shpreh kundër këtij projektligji dhe tha se “duket qartë përpjekja e qeverisë për të dhënë koncesionin e radhës”.
“Është projektligj ku parashikimi buxhetor, të paktën atë se çfarë keni thënë e keni deklaruar ju, mbi 5 miliardë lekë kosto, dhe e mbyllni relacionin duke thënë se këto efekte financiare do të përballohen nga buxheti i kompanisë “IdentiTek” ose në varësi të studimit të vizibilitetit nga shoqëri të tjera që kanë kapacitete teknike dhe financiare”, tha Çupi.
Sipas Çupit “është një përpjekje e hapur për të intimiduar dhe sigurisht, për të bërë favorin e radhës për t’i dhënë kompanisë qeveritare koncesionin e radhës, minimumi prej 5 miliardë lekësh”.
Çupi tha më tej se “është një projektligj që nuk ua kërkon Bashkimi Evropian dhe nuk synon përafrimin e rregullores së BE-së”.
Çupi po ashtu theksoi se është një projektligj që është haptas në kundërshtim me Kodin Zgjedhor.
“Kodi Zgjedhor e ndalon mbas datës 11 janar deri më 11 maj çdo përpjekje të qeverisë për të marrë vota dhe për të blerë vota të qytetarëve dhe për të premtuar vota qytetarëve apo kompanive”, tha Çupi.
