Ambasadorja e Izraelit në Kosovë, Tammy Ziv dhe rektori i Universitetit të Prishtinës, Arben Hajrullahu, u pajtuan në një takim që bashkëpunimet universitare mund të forcojnë urat e miqësisë mes dy popujve e shteteve.
Rektori Hajrullahu i tregoi mysafires së tij të lartë se Universiteti i Prishtinës është i interesuar të bashkëpunojë me universitete izraelite në fushat e bujqësisë, teknologjisë informative dhe menaxhimit të ujërave.
Ambasadorja Ziv tha se Izraeli është shteti numër një në botë për menaxhim ujërash, ndërsa sugjeroi për këtë qëllim dhe për teknologji informative, bashkëpunim të UP-së me Thecnion — Institutin e Teknologjisë së Izraelit
Ambasadorja përmendi se Universiteti Hebraik në Jerusalem ka një program shumë të mirë për bujqësi. Për këtë fushë e lavdëroi edhe Institutin qeveritar të Hulumtimeve Volcani.
Një student nga Kosova tashmë është duke studiuar në nivelin master në Universitetin e Haifas në Izrael, ndërsa sipas ambasadores së këtij shteti, pritet të nisin studimet edhe dy studentë të tjerë nga Kosova.
Bashkëpunime të personelit dhe studentëve të universiteteve izraelite dhe UP-së kanë ndodhur dhe do të ndodhin edhe në Universitetin Veror të Prishtinës që sivjet shënon përvjetorin e tij të 25-të.
Në takim me ambasadoren e Izraelit Tammy Ziv morën pjesë edhe prorektorja për ndërkombëtarizim dhe shkëmbim akademik Rozafa Basha, dekani i Fakultetit të Edukimit Blerim Saqipi dhe drejtori i Zyrës për Kërkime dhe Projekte të Sponsorizuara, Fitim Seferi.
