Shkup, 18 shkurt – Me qëllim përmirësimin e kushteve të jetesës dhe reduktimin e konsumit të energjisë, Komuna e Çairit po zbaton një projekt të rëndësishëm për efiçiencën energjetike në ndërtesat kolektive.
Ky projekt, i cili ishte edhe një nga premtimet tona parazgjedhore, parashikon financimin e 30% të investimeve, ndërsa pjesa tjetër do të mbulohet nga vetë banorët. Kjo iniciativë synon të ndihmojë komunitetet të reduktojnë shpenzimet për energji dhe të krijojnë kushte më të mira banimi.
Përveç ndërtesave kolektive, kemi përfunduar gjithashtu implementimin e masave të efiçiencës energjetike në të gjitha shkollat fillore dhe çerdhet publike në territorin e komunës, duke garantuar ambiente më të sigurta dhe më efikase për nxënësit dhe fëmijët tanë.
Procesi i aplikimit do të zhvillohet në mënyrë plotësisht transparente, përmes një thirrjeje publike, duke siguruar mundësi të barabarta për të gjithë banorët e interesuar. Ky është një hap konkret drejt një Çairi më modern, më efikas dhe më të qëndrueshëm.
